अर्घाखाँची । अर्घाखाँची जिल्लामा प्रतिनिधि सभा सदस्य पदको मतगणना तीव्र रूपमा अघि बढिरहेको छ। आज बिहान ८:५० बजेसम्मको पछिल्लो मत परिणामअनुसार राष्ट्रिय स्वतन्त्र पार्टी (रास्वपा) ले फराकिलो मतान्तरसहित आफ्नो अग्रता कायम गरिरहेको छ। प्राप्त विवरणअनुसार 'घण्टी' चुनाव चिह्न भएको राष्ट्रिय स्वतन्त्र पार्टीका उम्मेदवार हरि भुसालले २५ हजार ८ सय १ मत प्राप्त गर्दै शीर्ष स्थान ओगटेका छन्।
रास्वपालाई पछ्याउँदै 'सूर्य' चुनाव चिह्न भएको नेकपा एमालेका उम्मेदवार पिताम्बर भुसाल १७ हजार ४ सय ५६ मतका साथ दोस्रो स्थानमा रहेको छ। पहिलो र दोस्रो स्थानमा रहेका दलबीच ८ हजार भन्दा बढी मतको अन्तर देखिएको छ। त्यसैगरी, 'रुख' चुनाव चिह्न भएको नेपाली कांग्रेस १२ हजार ५ सय १ मत प्राप्त गर्दै तेस्रो स्थानमा रहेको छ। अन्य दलहरूतर्फ 'तारा' चुनाव चिह्न रहेको नेपाली कम्युनिस्ट पार्टीले ३ हजार ४ सय २५ मत ल्याएको छ भने 'गिलास' चुनाव चिह्न भएको राष्ट्रिय जनमोर्चाले १ हजार ७ सय ३७ मत प्राप्त गरेको छ। निर्वाचन अधिकृतको कार्यालयका अनुसार हालसम्म अन्तिम नतिजा आइनसकेको र मतगणना कार्य निरन्तर रूपमा जारी रहेको छ।
