कञ्चन । रुपन्देही कञ्चन गाउँपालिका -१ को कार्यालयले वडाका सामुदायिक विद्यालययहरुमा लागु पदार्थ दुर्व्यसनी बिरुद्धको सचेतना कार्यक्रम सञ्चालन गरेको छ। तालिममा ईलाका प्रहरी कार्यालय रुद्रपुरमा प्रहरी निरीक्षक अनिश खडकाले लागु पदार्थ दुर्व्यसनीबारे प्रशिक्षण दिनु भएको छ।
कार्यक्रमको पहिलो दिन प्रगती माध्यमिक विद्यालय, कञ्चन -१ बेलभरियामा अध्ययनरत कक्षा ९ का विद्यार्थीहरुका लागि लागु पदार्थ सेवनले मानसिक, शारीरिक, सामाजिक, पारिवारिक, आर्थिक तथा सांस्कृतिक रुपमा पार्ने असरका बारेमा अभिमुखीकरण गरिएकको छ।
कार्यक्रमको शुभारम्भ गर्दै वडा नं. १ का वडा अध्यक्ष हरि नारायण थारुले सभ्य समाजको बाधकको रुपमा रहेको लागु पदार्थ दुर्ब्यसनी निर्मुल पार्न चुनौती भएपनि समस्याको समाधान गर्ने कुरा कुनै असम्भव नरहेको कुरा बताउनु भयो। कञ्चनलाई लागु पदार्थ दुर्ब्यसनी रहित बनाउने पालिकाको नीति तथा कार्यक्रम अन्तर्गत वडाले वडाका विभिन्न सामुदायिक विद्यालयका विद्यार्थीहरुलाई केन्द्रित गरेर सचेतनामुलक कार्यक्रमको आयोजना गरिएको वडा अध्यक्ष थारुले बताउनु भयो।
कार्यक्रममा स्वागत गर्दै वडा सदस्य लेखा राहादीले किशोर किशोरीहरु अवस्था भनेको विभिन्न नकारात्मक सोंच र चिन्तनहरुबाट संक्रमित भई कुलत बाटोमा डोरिन सक्ने अवस्थालाई मध्यनजर गरी विद्यालय केन्द्रित सचेतनामुलक अभिमुखीकरण कार्यक्रम सञ्चालन गरिएको बताउनु भयो।
कञ्चन गाउँपालिका - १ का वडा अध्यक्ष हरिनारायण थारुको अध्यक्षतामा भएको कार्यक्रममा वडा सचिव मधुकला घर्तिले कार्यक्रम सञ्चालन गर्नु भएको थियो । वडाको आयोजना तथा ईलाका प्रहरी कार्यालय, रुद्रपुरको समन्वयमा सञ्चालन भएको सचेतनामुलक कार्यक्रम दुर्गा माध्यमिक विद्यालय र जनज्योति माध्यमिक विद्यालयमा समेत सञ्चालन हुने छ।
