भैरहवा । नजिकिँदै गरेका तिहार, दीपावली र छठ पर्वलाई लक्षित गर्दै रुपन्देही प्रहरीले जिल्लाभरि एक सुदृढ र विशेष सुरक्षा योजना कार्यान्वयनमा ल्याएको छ । यस वर्षका चाडपर्वहरूमा कुनै पनि अप्रिय घटना हुन नदिन र नागरिकहरूले शान्तिपूर्ण वातावरणमा पर्व मनाउन सकून् भन्ने उद्देश्यका साथ ७०० भन्दा बढी प्रहरी कर्मचारी परिचालन गरिएको जिल्ला प्रहरी कार्यालय रुपन्देहीका प्रमुख प्रहरी उपरीक्षक (एसपी) प्रदीप बहादुर क्षेत्रीले जानकारी दिनुभयो ।
एसपी क्षेत्रीले रुपन्देहीको समग्र शान्ति सुरक्षालाई प्राथमिकतामा राखी रणनीतिक सुरक्षा योजना तयार पारेको बताउनुभयो । उहाँले जनतालाई ढुक्क भएर चाडपर्व मनाउन आग्रह गर्दै भन्नुभयो, “हामी तपाईंहरूको सुरक्षाका लागि प्रतिबद्ध छौं । शान्ति सुरक्षामा खलल पुर्याउने वा अशान्ति फैलाउने कुनै पनि व्यक्तिलाई कानुनको दायरामा ल्याइनेछ ।“चाडपर्वको समयमा चोरी–तस्करी, लुटपाट, जबरजस्ती चन्दा संकलन, झै–झगडा, ठगी, सवारी दुर्घटना, हैरानी, अवैध हातहतियार तथा लागूऔषध ओसारपसार जस्ता आपराधिक क्रियाकलाप बढ्न सक्ने सम्भावनालाई मध्यनजर गर्दै प्रहरीले नियन्त्रण तथा न्यूनीकरणका लागि कमाण्ड पोस्ट स्थापना गरी विभिन्न टोलीमार्फत प्रहरी परिचालन गरेको छ ।
एसपी क्षेत्रीले चाडपर्व मनाउन कतै टाढा जाँदै हुनुहुन्छ भने सामाजिक सञ्जालमा तत्काल पोस्ट नगर्न र आफूहरू जाँदै गरेको जानकारी नदिन आग्रह गर्नुभएको छ । साथै, जिल्ला प्रशासन कार्यालयले तोकेको देउसी भैलोको समयमा मात्र भैलो खेल्न र सभ्य तथा अनुशासित भई चाडपर्व मनाउन समेत उहाँले आह्वान गर्नुभयो ।
सुरक्षाका मुख्य प्राथमिकताका क्षेत्रहरू अन्तर्गत एयरपोर्ट, कारागार, बाल सुधार गृह लगायतका संवेदनशील क्षेत्रहरूको सुरक्षा व्यवस्था कडा पारिएको छ । विभिन्न क्लब तथा समूहले आयोजना गर्ने सांस्कृतिक कार्यक्रमहरूमा भीडभाड व्यवस्थापन र सुरक्षा सुनिश्चित गरिनेछ । सीमा क्षेत्रमा हुन सक्ने ठगी, लुटपाट र चोरी तस्करी नियन्त्रणमा विशेष ध्यान दिइनेछ । पटका, आतसबाजी लगायतका विस्फोटक पदार्थ र देउसी भैलो खेल्ने दुई समूहबीच हुन सक्ने झैझगडा नियन्त्रणमा पनि प्रहरी सक्रिय रहनेछ । अवैध हातहतियार र लागूऔषध ओसारपसार नियन्त्रणमा विशेष निगरानी राखिनेछ । जुवा, चन्दा लगायतका गैरकानुनी गतिविधिहरूको गोप्य रूपमा सूचना संकलन गरी कारबाहीको दायरामा ल्याइने प्रहरीले जानकारी दिएको छ ।
रुपन्देहीमा प्रहरी प्रमुखको रूपमा एसपी प्रदीप बहादुर क्षेत्रीको आगमनसँगै जिल्लाको शान्ति सुरक्षामा उल्लेखनीय सुधार आएको स्थानीय नागरिक र सरोकारवाला निकायले महसुस गरेका छन् । उहाँको सक्रिय फिल्ड उपस्थिति, कुशल नेतृत्व र रणनीतिक कार्ययोजनाका कारण रुपन्देहीमा अपराधका घटनाहरूमा कमी आएको छ । चोरी, डकैती, गुण्डागर्दी लगायतका आपराधिक गतिविधिमाथि नियन्त्रण कायम भएको छ, जसले गर्दा यस वर्षका चाडपर्वहरूमा नागरिकहरूले थप सुरक्षित महसुस गर्न सक्नेछन् ।
