नवलपरासी । जिल्ला प्रहरी कार्यालय नवलपरासीले पछिल्लो दुई दिनमा जिल्लाका विभिन्न स्थानबाट करिब ३ लाख ५७ हजार रुपैयाँ बराबरको भन्सार छलीका अवैध सामान बरामद गरेको छ । प्रहरीको संयुक्त गस्ती टोलीले बर्दघाट, सरावल, रामग्राम, सुनवल र प्रतापपुरका विभिन्न स्थानबाट उक्त मूल्य बराबरका सामान नियन्त्रणमा लिएको हो ।
बरामद गरिएका सामानमा सबैभन्दा बढी मूल्यको कफी र कस्मेटिक सामग्री रहेका छन् । यसका साथै प्रहरीले एसी ग्यास, कपडा, पित्तलका मूर्ति र माछा लगायतका अन्य सामग्री पनि बरामद गरेको छ । बरामद गरिएका सम्पूर्ण सामान आवश्यक कारबाहीका लागि महेशपुर भन्सार कार्यालयमा पठाइएको र सीमा क्षेत्रमा निगरानी बढाइएको जिल्ला प्रहरी कार्यालयले जनाएको छ।
