काठमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले मौसममा आएको परिवर्तन सँगै बढ्दो चिसोका कारण देशका विभिन्न भागमा जनजीवन कष्टकर बनेको भन्दै चिन्ता व्यक्त गर्नुभएको छ । आज एक अपिल जारी गर्दै संयोजक दाहालले तराई–मधेसमा चलिरहेको शीतलहर र उच्च पहाडी तथा हिमाली क्षेत्रमा भइरहेको हिमपातले आम नागरिकको दैनिक जीवनमा गम्भीर असर पुर्याएको बताउनुभएको हो ।
दाहालले आफ्नो अपिलमा विशेषगरी समाजका गरिब, विपन्न र सीमान्तकृत वर्ग चिसोबाट बढी पीडित भएको उल्लेख गर्नुभएको छ । "चिसोका कारण खासगरी समाजका गरिब तथा सीमान्तकृत वर्गका जनता बढी पीडित भएका छन्, उनीहरूलाई तत्काल सहयोग पुर्याउन म सम्बद्ध सबै पक्षसँग हार्दिक अनुरोध गर्दछु," अपिलमा भनिएको छ ।
संयोजक दाहालले बढ्दो चिसोका कारण हुन सक्ने मानवीय क्षति र स्वास्थ्य समस्यालाई रोक्न आवश्यक प्रतिकार्यका लागि स्थानीय, प्रदेश र संघीय गरी तीनवटै तहका सरकारसँग विशेष आग्रह गर्नुभएको छ । उहाँले विपद्को यस घडीमा सरकारले सक्रियता देखाउनुपर्नेमा जोड दिनुभएको छ ।
