मर्चवार । रुपन्देहीको कोटहीमाई गाउँपालिकामा युरिया मल नपाएको झोँकमा एक व्यक्तिले सहकारीका अध्यक्षमाथि पेट्रोल प्रहार गरेका छन्। प्रहरीले आक्रमणमा संलग्न व्यक्तिलाई पक्राउ गरी अनुसन्धान थालेको छ।
इलाका प्रहरी कार्यालय, मझगाँवाका अनुसार, कोटहीमाई गाउँपालिका-३ मर्यादपुरस्थित गणेश साझा सहकारी संस्थाका अध्यक्ष ५७ वर्षीय रामपूत राजभरमाथि सोही स्थानका ४३ वर्षीय चन्द्र मोहन गुप्ताले पेट्रोल प्रहार गरेका हुन्। मंगलबार दिउँसो करिब १२ बजेतिर बाटोमा हिँडिरहेका राजभरलाई गुप्ताले पछाडिबाट आएर मिनरल वाटरको बोतलमा बोकेको पेट्रोल छर्केका थिए।
प्रहरीको प्रारम्भिक अनुसन्धान अनुसार, सहकारीबाट युरिया मल नपाएको विषयमा विवाद हुँदा गुप्ताले आक्रोशमा आएर यस्तो हर्कत गरेको खुलेको छ।
घटनालगत्तै इलाका प्रहरी कार्यालय, मझगाँवाबाट खटिएको प्रहरी टोलीले गुप्तालाई नियन्त्रणमा लिएको प्रहरी निरीक्षक सन्तोष बस्यालले जानकारी दिए। पक्राउ परेका गुप्तालाई इलाका प्रहरी कार्यालयमा राखेर घटनाबारे थप अनुसन्धान भइरहेको प्रहरीले जनाएको छ।
