विराटनगर । कोशी प्रदेशका मुख्यमन्त्री केदार कार्कीले सामाजिक विभेद हटाउन कुनै एक निकाय वा संस्थाको मात्र प्रयास पर्याप्त नहुने भन्दै सबै क्षेत्रको योगदान हुनुपर्ने बताएका छन् ।
मानव अधिकारका लागि स्रोत विकास मञ्च नेपालद्वारा आज विराटनगरमा आयोजित ५९औँ अन्तर्राष्ट्रिय जातीय विभेद तथा रंगभेद उन्मूलन दिवसको उपलक्ष्यमा आयोजित कार्यक्रममा उनले यस्तो बताएका हुन् ।
दलित समुदायका जनप्रतिनिधिहरुको सहभागिता रहेको तेस्रो प्रदेश सम्मेलन उद्घाटन कार्यक्रममा बोल्दै मुख्यमन्त्री कार्कीले लोकतन्त्र र गणतन्त्रको मर्मअनुसार सामाजिक भेदभाव तथा छुवाछुत जस्ता विकृति हटाउनुपर्नेमा जोड दिए ।
जनप्रतिनिधिहरुले सबै जात एवं समुदायको प्रतिनितित्व गर्नुपर्ने भन्दै उनले कसैप्रति पनि पूर्वाग्रह राख्नु नहुने बताए । कार्यक्रममा सामाजिक विकासमन्त्री राजेन्द्र कार्कीले सामाजिक विभेद र छुवाछुत अन्त्य गर्न सबै पक्षको योगदान आवश्यक पर्ने बताए ।
यसैगरी, एमालेका कोशी प्रदेश अध्यक्ष घनश्याम खतिवडाले सबै नेपालीबीच एकता कायम गरी समाजमा रहेका विकृति, विभेद एवं छुवाछुतको अन्त्य गर्नुपर्नेमा जोड दिए ।
