भैरहवा । भैरहवामा आयोजित लुम्बिनी प्रदेशस्तरीय सुरक्षा गोष्ठीलाई सम्बोधन गर्दै गृहमन्त्री ओमप्रकाश अर्यालले सुशासन प्रवद्र्धन र निर्वाचन सम्पन्न गर्नु वर्तमान सरकारको मुख्य अभिभारा रहेको बताउनुभएको छ । उहाँले चुनाव हुँदैन भन्ने सार्वजनिक खपतका अभिव्यक्ति दिनेहरूलाई सरकारले आफ्नो काम र भूमिकाबाटै जवाफ दिने स्पष्ट पार्नुभयो । सरकारले विगतको त्रासदीपूर्ण सुरक्षा अवस्थालाई सामान्य बनाउँदै लुटिएका हतियार र फरार कैदीबन्दी फिर्ता ल्याउन सफल भएको समेत उहाँले दाबी गर्नुभयो ।
भदौमा ‘जेनजी’ युवाहरूको आन्दोलनपछि विशेष परिस्थितिमा यो सरकार गठन भएको स्मरण गराउँदै गृहमन्त्री अर्यालले लुम्बिनी प्रदेशमा हुने राजस्व चुहावट रोक्न र नेपाल–भारत सीमानाकामा कडाइ गर्न सुरक्षा अधिकारीहरूलाई कडा निर्देशन दिनुभयो । सोही कार्यक्रममा लुम्बिनी प्रदेशका मुख्यमन्त्री चेतनारायण आचार्यले नेताहरू बिग्रिए पनि मुलुकको प्रणाली नबिग्रिएको भन्दै संविधानको रक्षा र सुशासनमा प्रदेश सरकार केन्द्रित रहेको बताउनुभयो । गृहसचिव तथा तिनै सुरक्षा निकायका प्रमुखहरूको सहभागिता रहेको उक्त गोष्ठीले आगामी निर्वाचनका लागि आवश्यक सुरक्षा रणनीति तय गर्ने बताइएको छ ।
