भैरहवा । रुपन्देहीको ओमसतिया गाउँपालिका–३ का वडाअध्यक्ष प्रकाश सिंह चौधरी जनताका समस्या समाधान गर्न आफैं फिल्डमा खटिएका छन् । वर्षाले बिगारेका सडक मर्मतदेखि नदी कटान नियन्त्रण सम्मका काममा उनको सक्रियताले स्थानीयमाझ उनी कुशल जनप्रतिनिधिको छवि बनाइरहेका छन् ।
पछिल्लो समय वर्षाका कारण बिग्रेका सडकहरू मर्मत गर्ने कार्यलाई उनले तीव्रता दिएका छन् । वडाको करुवानी र लोहरौली जोड्ने सडकमा देखिएको समस्या समाधान भइसकेको उनले बताए । ‘म जनतासँग गरेका वाचा पूरा गर्दैछु, जनताको प्रश्नसँग कहिल्यै डराएर भागिनँ,’ अध्यक्ष चौधरीले भने, ‘मेरो वडाको टिम सधैं जनताको सेवामा समर्पित छ । अहिले प्रत्यक्ष देख्न सक्नुहुन्छ, म आफैँ फिल्डमा खटेको छु, मेरो वडाका सदस्यहरू पनि मलाई साथ दिइरहनु भएको छ ।’
सडक मर्मतसँगै उनले रोहिणी नदीले कटान गर्ने बडसरी गाउँलाई सुरक्षित बनाउन पनि पहल थालेका छन् । नदी कटान रोकथामका लागि आवश्यक बोरा संकलन गर्न उनी जलस्रोत तथा सिंचाई विकास डिभिजन कार्यालय भैरहवामा आफैँ पुगेका छन् । ‘जनतालाई दुःख हुनुभएन,’ उनले भने, ‘जनताले जिताएर पठाएपछि जनप्रतिनिधि मालिक होइन, सधैं जनताको नोकर भएर जनताकै बीचमा रहनुपर्छ ।’ आफ्नो कार्यकालभरि जनताको हरेक सुखदुःखमा साथ रहने प्रतिबद्धता व्यक्त गर्ने चौधरीको सक्रियता र जनताप्रतिको समर्पणले वडावासीमा आशा र भरोसा जगाएको छ ।
