सन्धिखर्क । अर्घाखाँची जिल्लाको सदरमुकाम सन्धिखर्कमा एक मासु पसलमा ग्यास सिलिन्डर विस्फोट हुँदा आगलागी भएको छ । सन्धिखर्क नगरपालिका–१, रतहलेमा रहेको मासु पसलमा दुईवटा ग्यास सिलिन्डर एकैसाथ विस्फोट भएपछि आगलागी भएको हो ।
सिलिन्डर विस्फोटनको ठूलो आवाजसँगै आगो फैलिएको थियो । घटनालगत्तै स्थानीयवासी, अन्य व्यवसायी र सुरक्षाकर्मीहरु तत्काल घटनास्थलमा पुगेर आगो नियन्त्रणमा लिएका थिए । प्रहरीका अनुसार सबैको समयमै भएको प्रयासका कारण आगो थप फैलिन नपाई नियन्त्रणमा आएको हो ।
आगलागीबाट पसलमा रहेका केही सामान जलेर नष्ट भए पनि कुनै पनि मानवीय क्षति भने नभएको जिल्ला प्रहरी कार्यालय अर्घाखाँचीले जनाएको छ । स्थानीयहरूले समयमै उद्धार कार्य भएकाले ठूलो क्षति हुनबाट जोगिएको बताएका छन् ।
आगो पूर्ण रूपमा नियन्त्रणमा आइसकेकाले थप जोखिम नरहेको प्रहरीले जनाएको छ । यसैबीच, प्रहरीले ग्यास सिलिन्डरको प्रयोग गर्दा उच्च सावधानी अपनाउन र विशेषगरी व्यावसायिक क्षेत्रमा आवश्यक सुरक्षा सामग्री तथा अग्नि नियन्त्रक उपकरणहरु अनिवार्य राख्न सबैलाई आग्रह गरेको छ ।
