काठमाडौं । सरकारी सेवामा कार्यरत कर्मचारीहरूले अबदेखि महिनामा दुई पटक तलब र भत्ता पाउने भएका छन्। अर्थ मन्त्रालयले मन्त्रीस्तरीय निर्णय गर्दै कर्मचारीहरूलाई हरेक १५–१५ दिनमा पारिश्रमिक उपलब्ध गराउने व्यवस्था मिलाउन मातहतका निकायमा परिपत्र जारी गरेको हो।
गत वैशाख ४ गते भएको निर्णयअनुसार अब महिना मरेपछि एकमुष्ट तलब बुझ्ने पुरानो परिपाटीको अन्त्य भएको छ। अर्थ मन्त्रालयले अर्धमासिक रूपमा तलब र भत्ता भुक्तानी गर्ने नयाँ प्रणालीको सुरुवात गर्दै कर्मचारीको जीविकोपार्जन र नगद प्रवाहलाई सहज बनाउन यस्तो कदम चालेको जनाएको छ। यो निर्णयसँगै अब सरकारी ढुकुटीबाट हुने खर्चको भुक्तानी प्रक्रियामा समेत नयाँ मोड आएको छ।
