अर्घाखाँची । सन्धिखर्क नगरपालिका–७ निवासी समाजसेवी भिम बहादुर नेपालीको परिवारले स्वर्गीय कुन्ती नेपालीको १२ औँ दिनको पुण्यतिथिको अवसरमा स्थानीय विद्यार्थीहरूलाई शैक्षिक सामग्री तथा आर्थिक सहयोग वितरण गरेको छ।शोकलाई शक्तिमा बदल्दै नेपाली परिवारले आफू पढेको र हुर्केको स्थानका शैक्षिक संस्थाहरूमा सहयोग गरेको हो।
परिवारले चन्द्र प्रभा माध्यमिक विद्यालयका करिब २६० जना र भगवती आधारभूत विद्यालयका ४० जना विद्यार्थीलाई कापी–कलम वितरण गरेको छ। साथै, चन्द्र प्रभा माविका १३ जना विद्यार्थीलाई जनही रु. २,००० का दरले कुल २६,००० रुपैयाँ नगद र ५ जना असहाय विद्यार्थीलाई रु. १०,००० बराबरको शैक्षिक सामग्री हस्तान्तरण गरिएको छ। यसका अतिरिक्त, ‘कुन्तीकला नेपाली स्मृति अक्षय कोष’ मा रु. ३०,००० जम्मा गरिएको छ।
मृतकका काइला छोरा एवं निर्माण व्यवसायी दुर्गा बहादुर नेपालीले आमाको प्रेरणाले नै आफूहरू समाजसेवामा अग्रसर भएको बताउनुभयो। नेपाली परिवार लामो समयदेखि जिल्लाको शिक्षा, स्वास्थ्य र विकास निर्माणमा सक्रिय रहँदै आएको छ।विद्यालयका प्रधानाध्यापकहरूले शोकको समयमा भोजभतेरमा खर्च गर्नुको साटो शिक्षा क्षेत्रमा लगानी गरेर नेपाली परिवारले समाज रूपान्तरणमा उदाहरणीय र प्रसंशनीय काम गरेको बताएका छन्।
