भैरहवा । रुपन्देहीको ओमसतिया गाउँपालिकामा राष्ट्रिय परिचयपत्र वितरण कार्यक्रम सुरु भएको छ। गाउँपालिका उपाध्यक्ष सुनिता चौधरीले सामाजिक सञ्जालमार्फत यो महत्वपूर्ण जानकारी गराउनुभएको हो। गाउँपालिकाको वडा नं. १ देखि ६ सम्म राष्ट्रिय परिचयपत्र वितरण कार्य जारी रहेको छ। सम्बन्धित वडाका सेवाग्राहीहरूलाई तोकिएको मिति र स्थानमा उपस्थित भई आफ्नो परिचयपत्र प्राप्त गर्न अनुरोध गरिएको छ। यस कार्यक्रमले स्थानीय बासिन्दाहरूलाई राष्ट्रिय परिचयपत्र प्राप्त गर्न सहज पुग्ने अपेक्षा गरिएको छ।
उपाध्यक्ष चौधरीका अनुसार, आज ओमसतिया वडा नम्बर १, २, ३, ४ र ६ मा परिचयपत्र वितरण कार्य सुरु भएको छ भने वडा नम्बर ५ मा आइतबारदेखि सञ्चालन हुनेछ। उपाध्यक्ष चौधरीले गाउँमै परिचयपत्र उपलब्ध भएकाले कोही पनि नछुटून् भन्दै सबैलाई आ-आफ्नो परिचयपत्र लिनका लागि आग्रह गर्नुभएको छ। उहाँले यस अभियानलाई सफल बनाउन सबैले आ-आफ्नो ठाउँबाट सहयोग गर्नुपर्नेमा जोड दिनुभएको छ।
