भैरहवा । नेकपा (एमाले) निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) भैरहवा बहुमुखी क्याम्पस कमिटी र सिद्धार्थनगर नगर कमिटी, रुपन्देहीले दीप प्रज्जवलन कार्यक्रम गरेको छ । १७ औं गणतन्त्र दिवसको अवसरमा मंगलबार साँझ भैरहवास्थित बुद्धचोकमा दीप प्रज्जवलन कार्यक्रम गरिएको (अनेरास्ववियु) भैरहवा बहुमुखी क्याम्पस कमिटीका अध्यक्ष विवेक भण्डारीले बताए ।
कार्यक्रममा बोल्दै प्रमुख अतिथि अनेरास्ववियुका केन्द्रीय सदस्य सागर न्यौपानेले हजारौंले बलिदान दिएर मुलुकमा आएको गणतन्त्र उपलब्धी संस्थागत गर्दै जानुपर्नेमा जोड दिए । भैरहवा बहुमुखी क्याम्पस स्वतन्त्र विद्यार्थी युनियन (स्ववियु) अध्यक्ष समेत रहेका न्यौपानेले भने, ‘गणतन्त्र नागरिकको आफ्नै व्यवस्था हो । यो व्यवस्थालाई अझ बलियो बनाउनुपर्छ ।’
अनेरास्ववियु भैरहवा बहुमुखी क्याम्पस कमिटीका अध्यक्ष विवेक भण्डारी र अनेरास्ववियु सिद्धार्थनगर नगर कमिटीका अध्यक्ष के.एल. पाण्डेको अध्यक्षता तथा नगर सचिव संजोग बस्यालको सञ्चालनमा भएको कार्यक्रममा अनेरास्ववियु लुम्बिनी प्रदेश उपाध्यक्ष एवं पूर्व वडा सदस्य सरोज ठकुरी, अनेरास्ववियु जिल्ला तथा नगरका नेताहरु तथा स्ववियु पदाधिकारी र सदस्यहरुको उपस्थिति रहेको थियो ।
