भैरहवा । नेपाल प्रहरीको महानिरीक्षक (आईजीपी)मा दीपक थापालाई नियुक्त गरिएको छ। ३० वर्षे सेवा अवधिका कारण आईजीपी बसन्त बहादुर कुँवर अनिवार्य अवकाशमा जान लागेपछि (आज राती १२ बजेबाट) सोमबार बसेको मन्त्रिपरिषद् बैठकले प्रहरी अतिरिक्त महानिरीक्षक (एआईजी) थापालाई ३१औं प्रहरी महानिरीक्षकमा नियुक्त गरेको हो।
आईजीपीका लागि थापासहित एआईजी सुदीप गिरी र टेकबहादुर तामाङबीच प्रतिस्पर्धा थियो । एकै ब्याचमा भर्ना भए पनि गिरी र तामाङ भन्दा थापा पहिल्यै बढुवा भएकाले एआइजीको वरियतामा उनी पहिलो नम्बरमा थिए। ३० वर्षे सेवा अवधि नहटे थापा ६ महिनापछि अवकाशमा जानेछन् । संसद्मा प्रहरी ऐनको प्रस्तावित विधेयक दर्ता छ । यो अवधिमा विधेयक पारित भए उनले थप ६ महिना प्रहरीको नेतृत्व गर्न पाउनेछन् ।
थापा केन्द्रीय अनुसन्धान ब्युरो (सीआइबी) प्रमुखको रुपमा कार्यरत छन्। गिरी राष्ट्रिय प्रहरी प्रशिक्षण प्रतिष्ठान र तामाङ उपत्यका प्रहरी कार्यालय, रानीपोखरीमा प्रमुख छन् । आईजी नियुक्तसँगै एआईजी र डीआईजी बढुवाको बाटो खुलेको छ।
