परासी । समुदाय प्रहरी साझेदारी कार्यक्रमको 'एक युनिट-एक कार्यक्रम' अवधारणा अन्तर्गत पश्चिम नवलपरासीमा सोमबार विभिन्न स्थानमा गरी ९ वटा जनचेतनामूलक कार्यक्रम सम्पन्न भएको छ । जिल्ला प्रहरी कार्यालय पश्चिम नवलपरासीका अनुसार, इलाका प्रहरी कार्यालय बेलाटारी, बर्दघाट, सुनवल, सेमरी तथा प्रहरी चौकी बसहिया, रामनगर, कुडिया र गुठीप्रसौनीबाट खटिएका प्रहरी टोलीले यी कार्यक्रमहरु आयोजना गरेका हुन् ।
स्थानीय जनप्रतिनिधि, नागरिक समाजका अगुवा तथा सर्वसाधारणको सहभागितामा आयोजित उक्त कार्यक्रमहरूमा आत्महत्या न्यूनीकरण तथा मनसुनजन्य विपद् व्यवस्थापन जस्ता महत्वपूर्ण विषयमा केन्द्रित रहेर छलफल तथा अन्तरक्रिया गरिएको थियो । यी कार्यक्रमहरूले प्रहरी र जनता बीचको सम्बन्धलाई अझ सुदृढ बनाउने अपेक्षा गरिएको छ ।
'हर प्रहर, गाउँ र नगरी, टोल टोलमा नेपाल प्रहरी' भन्ने मूल नाराका साथ सुरु भएको समुदाय-प्रहरी साझेदारी कार्यक्रमले जिल्लामा शान्ति सुरक्षा कायम गर्न तथा सामाजिक सचेतना अभिवृद्धि गर्न महत्वपूर्ण भूमिका खेलेको छ । यस अभियान अन्तर्गत जिल्लाका विभिन्न स्थानमा लागुऔषध दुरुपयोग तथा ओसारपसार, साइबर अपराध, सवारी दुर्घटना न्यूनीकरण जस्ता विषयमा पनि सचेतनामूलक कार्यक्रमहरू सञ्चालन गरिँदै आएको छ ।
जिल्ला प्रहरी कार्यालय पश्चिम नवलपरासीले दिएको जानकारी अनुसार, कार्यक्रमको अवसरमा प्रहरी टोलीले प्रहरीका सहयोगीहरुसँग भेटघाट तथा छलफल समेत गरेको थियो । समुदायसँगको सहकार्यमा विकृति र विसंगति विरुद्ध लड्दै अपराध न्यूनीकरणमा यो कार्यक्रम प्रभावकारी ठहरिएको प्रहरीको विश्वास छ । नेपाल प्रहरीले यस्ता सचेतनामूलक कार्यक्रमलाई देशभर अभियानकै रुपमा सञ्चालन गरिरहेको छ । पछिल्लो समय नेपालमा बढ्दो आत्महत्याका घटनालाई न्यूनीकरण गर्न नेपाल प्रहरीले विभिन्न सरोकारवाला निकायसँगको सहकार्यमा विशेष कार्यक्रमहरू सञ्चालन गर्दै आएको छ , जसले गर्दा प्रहरी र जनताबीच प्रत्यक्ष संवाद स्थापित भई सुरक्षित र सचेत समाज निर्माणमा योगदान पुगेको छ ।
