भैरहवा । रुपन्देहीको सिद्धार्थनगर–१ बेलहियास्थित शान्ति पुनर्स्थापना गृहले मानव बेचबिखन तथा ओसारपसार नियन्त्रणमा गर्दै आएका गतिविधिहरूको सरोकारवाला निकायहरूले स्थलगत अनुगमन गरेका छन् । प्रमुख जिल्ला अधिकारी माधव प्रसाद पोख्रेल, जिल्ला प्रहरी प्रमुख प्रहरी उपरीक्षक प्रदीप बहादुर क्षेत्री, जिल्ला समन्वय समिति प्रमुख उमाकान्त चपाई, सिद्धार्थनगर नगरपालिकाकी उपप्रमुख उमा अधिकारी लगायतको टोलीले संस्थाको सेवा प्रवाह, प्रभावकारिता र कार्यसम्पादनबारे जानकारी लिएको हो ।
अनुगमनका क्रममा जिसस प्रमुख चपाईले सीमा क्षेत्र संवेदनशील भएकाले समुदायमा सचेतना जगाउन र स्थानीय तहसँग समन्वय गर्न सुझाव दिनुभयो । यस्तै, प्रहरी उपरीक्षक क्षेत्रीले सुरक्षा निकायसँग सूचना आदानप्रदान र जोखिममा परेकाहरूको तत्काल उद्धार प्रणाली सुदृढ गर्नुपर्नेमा जोड दिनुभयो ।
टोलीले संस्थाले पुर्याएको योगदानको प्रशंसा गर्दै आगामी दिनमा मानव बेचबिखनविरुद्धको अभियानलाई थप प्रभावकारी बनाउन सरोकारवालाबीच बलियो सहकार्य आवश्यक रहेको औंल्याएको छ । संस्थाले वि.सं. २०७९ देखि रुपन्देहीमा मानव बेचबिखनविरुद्ध काम गर्दै आएको छ ।
