कपिलवस्तु । प्रतिनिधिसभा निर्वाचन नजिकिएसँगै राजेन्द्र महतो नेतृत्वको राष्ट्रिय मुक्ति पार्टी नेपालले कपिलवस्तु जिल्लाका तीनवटै निर्वाचन क्षेत्रका लागि उम्मेदवार सिफारिस गरेको छ। जिल्ला अध्यक्ष कैलाश अग्रहरीको संयोजकत्वमा आज बसेको जिल्ला बैठकले निर्वाचन क्षेत्र नम्बर १, २ र ३ बाट प्रतिनिधिसभा सदस्यका लागि प्रत्यक्ष र समानुपातिक तर्फका उम्मेदवारहरूको नाम सर्वसम्मत रूपमा सिफारिस गरेको हो।
पार्टीका केन्द्रीय सहमहासचिव रविदत्त मिश्रले दिनुभएको जानकारी अनुसार निर्वाचन क्षेत्र नम्बर १ को प्रत्यक्षतर्फ चिन्नीलाल विश्वकर्मा र मोहम्मद अली मुसलमानको नाम सिफारिस भएको छ भने समानुपातिकतर्फ अब्दुल अजीज मुसलमानको नाम छनोट गरिएको छ। त्यस्तै, निर्वाचन क्षेत्र नम्बर २ मा प्रत्यक्षतर्फ जामवन्ति मुज, श्रीराम माली र दिलिप कुमार चौधरीको नाम सिफारिस गरिएको छ। सोही क्षेत्रको समानुपातिकतर्फ मधेशी कोटामा जिल्ला अध्यक्ष कैलाश प्रसाद अग्रहरी र सुमन चौधरी तथा मुस्लिम तर्फबाट नाजिया खानको नाम अगाडि सारिएको छ।
यसैगरी निर्वाचन क्षेत्र नम्बर ३ मा प्रत्यक्षतर्फ केन्द्रीय सहमहासचिव रविदत्त मिश्रसहित हिरा लाल यादव र शिव कुमार कोलापुरीको नाम सिफारिस भएको छ। यस क्षेत्रको समानुपातिकतर्फ सुरेश कुमार जायसवाल, खस आर्यबाट सीता खनाल, लवकुश मिश्रा र मुस्लिम तर्फबाट इनतजार खाँको नाम सर्वसम्मत सिफारिस गरिएको नेता मिश्रले बताउनुभयो।
