भैरहवा । अग्रहरि सेवा समाज तथा उपसमिति अग्रहरी महिला मञ्च रुपन्देहीले हिन्दु महिलाहरुको महान चाडपर्व हरितालिका तीजको अवसरमा एक विशेष कार्यक्रमको आयोजना गरेको छ । भैरहवामा आयोजित "तीज मिलन तथा दर खाने कार्यक्रम" मा समुदायका सदस्यहरुको उत्साहजनक सहभागिता रहेको थियो ।
अग्रहरी महिला मञ्चकी अध्यक्ष आरती अग्रहरीको अध्यक्षतामा सम्पन्न उक्त कार्यक्रमका प्रमुख अतिथि राष्ट्रीय वैश्य महासंघ नेपाल, रुपन्देहीका अध्यक्ष अमित कुमार गुप्ता रहनुभएको थियो । कार्यक्रमलाई सम्बोधन गर्दै प्रमुख अतिथि गुप्ताले यस्ता कार्यक्रमले महिलाहरुलाई आफ्नो प्रतिभा प्रदर्शन गर्ने अवसर प्रदान गर्नुका साथै समाजमा सकारात्मक सन्देश प्रवाह गर्ने बताउनुभयो । उहाँले हरितालिका तीजलाई केवल मनोरञ्जनको माध्यम मात्र नभई महिला सशक्तीकरण र संस्कृतिको संरक्षण गर्ने महत्वपूर्ण अवसरको रुपमा व्याख्या गर्नुभयो ।
कार्यक्रममा अग्रहरि सेवा समाज, रुपन्देहीका निवर्तमान अध्यक्ष सियाराम अग्रहरि, संस्थापक अध्यक्ष जोगेन्द्र अग्रहरि, डा. योगेन्द्र अग्रहरि, माया अग्रहरि, डा. शकुन्तला गुप्ता, इन्दु कुँवर, र राधारमण अग्रहरि लगायतका वक्ताहरुले शुभकामना मन्तव्य व्यक्त गर्नुभएको थियो । सो अवसरमा अग्रहरि समाजका पदाधिकारीहरु पारस नाथ अग्रहरि, मधु अग्रहरि, बिन्दवाशिनी अग्रहरि, मिरा अग्रहरि, सिमा अग्रहरि, मीना अग्रहरि, विनीता अग्रहरि, र प्रियंका अग्रहरि लगायतको सक्रिय सहभागिता रहेको थियो ।
विभिन्न सांस्कृतिक तथा मनोरञ्जनात्मक कार्यक्रमहरु समेत समावेश गरिएको उक्त कार्यक्रमको सञ्चालन आँचल अग्रहरीले गर्नुभएको थियो । कार्यक्रममा नृत्य, पास-पास, र बेलुन फुटाउने जस्ता रमाइला खेलहरु पनि खेलाइएको थियो, जसले कार्यक्रममा थप रौनक थपेको थियो ।
