कञ्चन । गौतमबुद्ध सामुदायिक विकास केन्द्रले गत साउन ३१ देखि भदौ १० गतेसम्म सञ्चालन गरेको दोस्रो गौतमबुद्ध कप नाइन ए साइड फुटबल प्रतियोगिता २०८२ को आम्दानी तथा खर्च विवरण सार्वजनिक गरेको छ। स्थानीय आमा समूह, क्लब, टोल विकास संस्थाका प्रतिनिधि र अगुवाहरूको उपस्थितिमा केन्द्रका अध्यक्ष कमल परियारले प्रतियोगिताको सम्पूर्ण आर्थिक विवरण प्रस्तुत गर्नुभयो ।
अध्यक्ष परियारले प्रतियोगिता सफल बनाउन आर्थिक, भौतिक तथा नैतिक रूपमा सहयोग गर्ने सबै सहयोगीदाता, स्थानीय तह, वडा, संघसंस्था र शुभेच्छुकहरूलाई धन्यवाद व्यक्त गर्नुभयो। उहाँले रातदिन खटिने स्वयंसेवक, खेलाडी, स्थानीय अगुवा, बुद्धिजीवी, आमा समूह, क्लब र टोल विकासका सदस्य तथा पदाधिकारीहरू प्रति पनि आभार व्यक्त गर्नुभयो ।
अध्यक्ष परियारले प्रतियोगिता सञ्चालनका लागि १० लाख १९ हजार १४ रुपैयाँ आम्दानी भएको र १ लाख ८८ हजार १५५ रुपैयाँ प्राप्त हुन बाँकी रहेको जानकारी दिनुभयो। कुल खर्च ८ लाख ६० हजार ४६ रुपैयाँ भएको पनि उहाँले सार्वजनिक गर्नुभयो ।
कार्यक्रममा प्रगति टोल विकास संस्थाका अध्यक्ष तथा केन्द्रका सल्लाहकार मोतीलाल थापा र सञ्जय काउछा मगरले कञ्चनको खेलकुद विकासमा गौतमबुद्ध सामुदायिक विकास केन्द्रले पुर्याएको योगदानको प्रशंसा गर्दै यसले फुटबल खेललाई राष्ट्रिय तथा अन्तर्राष्ट्रिय स्तरमा कञ्चनको पहिचान स्थापित गर्न महत्त्वपूर्ण भूमिका खेलेको बताउनुभयो । केन्द्रका अध्यक्ष कमल परियारको अध्यक्षतामा भएको कार्यक्रमको सञ्चालन सचिव हिरालाल विश्वकर्माले गर्नुभएको थियो ।
