भैरहवा । भैरहवामा जारी ‘पवनकुमार सेठिया स्मृति क्रिकेट प्रतियोगिता’ अन्तर्गतको टी–ट्वान्टी सिरिजको उपाधि रुपन्देही–११ ले जितेको छ। रुपन्देही क्रिकेट संघको आयोजनामा सिद्धार्थ क्रिकेट मैदानमा बुधबार भएको दोस्रो खेलमा त्रिभुवन आर्मी क्लब ‘ए’ लाई ६ विकेटले पराजित गर्दै रुपन्देहीले एक खेल अगावै सिरिज आफ्नो पक्षमा पारेको हो। यसअघि सम्पन्न दुई दिवसीय र एकदिवसीय सिरिजमा पनि रुपन्देहीले आर्मीविरुद्ध ‘क्लिनस्वीप’ गरिसकेको छ।
बुधबारको खेलमा टस जितेर पहिले ब्याटिङ गरेको आर्मीले सबै विकेट गुमाउँदै १ सय १८ रनको मध्यम योगफल तयार गरेको थियो। आर्मीका लागि निर्मल शाहीले ४० रन बनाए। जवाफी ब्याटिङमा उत्रिएको रुपन्देहीले १७ ओभरमा ४ विकेट गुमाएर विजय लक्ष्य पूरा गर्यो। रुपन्देहीको जितमा आकाश त्रिपाठीले अलराउन्ड प्रदर्शन गर्दै अविजित ३९ रन बनाए भने बलिङतर्फ २ विकेट समेत लिएर ‘प्लेयर अफ द म्याच’ घोषित भए। नेपालमै पहिलोपटक तीनवटा फर्म्याटमा दुई टोलीबीच भइरहेको यो प्रतियोगितालाई सेठिया परिवारले स्वर्गीय बुवा पवनकुमार सेठियाको स्मृतिमा मुख्य प्रायोजन गरेका हुन्। सिरिजको अन्तिम खेल बिहीबार हुने आयोजकले जनाएको छ।
