रुपन्देही-४ का सांसद बनियाको मतदातालाई अपिल : ‘हामीलाई कामको लिस्ट दिनुहोस्, हामी विकास गर्छौं’

भैरहवा । रुपन्देही निर्वाचन क्षेत्र नम्बर ४ को विकासलाई व्यवस्थित, प्रभावकारी र जनमुखी बनाउन स्थानीयस्तरबाटै योजना संकलनको पहल थालिएको छ । यस क्षेत्रबाट प्रतिनिधिसभा सदस्यमा निर्वाचित सांसद कन्हैया बनियाले आफ्नो क्षेत्रको विकासका लागि आवश्यक पर्ने योजना र कार्यक्रमको सुझाव दिन आम नागरिकलाई आग्रह गरेका छन् ।

स्थानीय, प्रादेशिक र संघीय सरकारमार्फत गर्न सकिने विकास निर्माणका कामलाई प्राथमिकतामा राखेर बजेट तथा कार्यक्रम तय गर्न सांसद बनियाले नागरिकस्तरबाटै सुझाव मागेका हुन् । निर्वाचन क्षेत्रलाई समृद्ध र विकसित बनाउने लक्ष्यसहित उनको निजी सचिवालयले एक अपिल जारी गर्दै बुद्धिजीवी, व्यवसायी, श्रमिक, किसान लगायत सम्पूर्ण मतदातालाई आफ्नो गाउँठाउँका आवश्यकता बोध गराउन अनुरोध गरेको छ ।

सचिवालयले जारी गरेको अपिलमा भनिएको छ, ‘हामीलाई कामको लिस्ट दिनुहोस्, हाम्रो क्षेत्रलाई समृद्ध र विकसित बनाउन हामी काम गर्छौं ।’जनताका वास्तविक समस्या र आवश्यकतालाई सम्बोधन गर्ने गरी योजना तर्जुमा गर्न यो कदम चालिएको सचिवालयले जनाएको छ । स्थानीय स्तरमा कुन योजनामा कसरी लगानी गर्दा प्रतिफलमुखी हुन्छ भन्नेबारे सुझाव दिन चाहने जोकोही नागरिकले सांसदको सचिवालयमा सिधै सम्पर्क गर्न सक्ने व्यवस्था मिलाइएको छ ।

आफ्नो क्षेत्रका आवश्यक योजना र कार्यक्रमबारे जानकारी गराउन इच्छुक व्यक्तिहरूले सचिवालयको सम्पर्क नम्बरहरु ९८००७२५१२१, ९८१५४१२४८७, ९७०१४८२००५ र ९८१६४४१६१३ मा फोन गरेर आफ्ना सुझाव तथा विकासका एजेन्डा टिपाउन सक्नेछन् । नागरिकको प्रत्यक्ष सहभागितामा बन्ने यस्ता योजनाले रुपन्देही-४ को समग्र विकासमा महत्त्वपूर्ण योगदान पुग्ने अपेक्षा गरिएको छ ।