कञ्चन, रुपन्देही । रुपन्देहीको कञ्चन गाउँपालिकामा ‘नवौं चाँदनी कप फुटबल प्रतियोगिता’ हिजोदेखि सुरु भएको छ। कञ्चन–१, दानापुरस्थित खेलमैदानमा भएको प्रतियोगिताको उद्घाटन गाउँपालिकाकी उपाध्यक्ष मौसमी थापा मगरले गर्नुभयो ।
उद्घाटन खेलमा आयोजक चाँदनी युवा क्लबले मुर्गिया एफ.सी.लाई २–१ गोल अन्तरले पराजित गर्दै विजयी सुरुवात गरेको छ। चाँदनीको जितमा सम्राट श्रीस र दिनेश हार्मेलले १–१ गोल गरे भने मुर्गियाका निशान्त न्यौपानेले १ गोल फर्काए। खेलमा आयोजक टिमका सम्राट श्रीस ‘म्यान अफ द म्याच’ घोषित भए।
चाँदनी युवा क्लबको आयोजनामा सञ्चालित यो प्रतियोगिता कञ्चनकै प्रतिष्ठित र दोस्रो ठूलो धनराशीको खेल हो। प्रतियोगिताको विजेताले नगद रु. १,६०,००० र उपविजेताले रु. ८०,००० सहित सिल्ड, मेडल र प्रमाणपत्र प्राप्त गर्नेछन्। साथै, उत्कृष्ट विधाका खेलाडीहरूलाई जनही ५ हजार रुपैयाँ प्रदान गरिने खेल संयोजक जुक्त बहादुर थापाले जानकारी दिनुभयो । रुपन्देही, कपिलवस्तु, नवलपरासी र पाल्पाका गरी १२ टिम सहभागी उक्त प्रतियोगिता मंसिर १२ गतेसम्म सञ्चालन हुनेछ ।
