कञ्चन । रुपन्देहीको कञ्चन गाउँपालिकामा निःशुल्क आँखा परिक्षण शिविर शुरु भएको छ। कञ्चन लायन्स क्लव अफ कञ्चन र लायन्स क्लव अफ कञ्चन लेडीको संयुक्त आयोजनामा सञ्चालित शिविरको पहिलो दिन कञ्चन–४ स्थित हिमालय आधारभूत विद्यालयमा १३२ जना सेवाग्राहीले आँखा परिक्षण गराएका छन्।
शिविरमा २७ जनामा मोतियाविन्दुको समस्या देखिएको र उनीहरूको कञ्चन लायन्स आँखा उपचार केन्द्र तथा लायन्स क्लव अफ आँखा अस्पताल बुटवलको प्राविधिक सहयोगमा निःशुल्क शल्यक्रिया गरिने संयोजक शसीधर सापकोटाले जानकारी दिनुभयो।
कञ्चन गाउँपालिकाको आर्थिक सहयोगमा सञ्चालित यो शिविर पालिकाका पाँचवटै वडामा सञ्चालन हुने लायन्स क्लव कञ्चन लेडीका अध्यक्ष चेलिका भूजेलले बताउनुभयो। शिविरको उद्घाटन गर्दै गाउँपालिका अध्यक्ष नवराज ढकालले नागरिकको स्वास्थ्यप्रति पालिका सचेत रहेको र स्थानीय संस्थाहरुसँग सहकार्य गर्दै अघि बढ्ने नीति रहेको बताउनुभयो।
