सिरहा । अख्तियार दुरुपयोग अनुसन्धान आयोगको टोलीले सब डिभिजन वन कार्यालय बन्दीपुर, सिरहाका कार्यालय प्रमुख रामकेवल राय यादवलाई रु १२ हजार घुससहित रंगेहात पक्राउ गरेको छ । आयोगको क्षेत्रीय कार्यालय बर्दिबासबाट खटिएको टोलीले यादवलाई कर्जन्हा नगरपालिका–४ स्थित एक स्थानबाट उक्त रकमसहित नियन्त्रणमा लिएको हो ।
कर्जन्हा नगरपालिका–२ मा सञ्चालित एक काठ उद्योगले विभिन्न स्थानबाट ल्याएको तीन ट्रक काठको प्रक्रिया मिलाइदिने बहानामा कार्यालय प्रमुख यादवले प्रतिट्रक रु चार हजारका दरले घुस माग गरेको अख्तियारले जनाएको छ । वन कार्यालयका प्रमुखले घुस माग गरेपछि पीडित उद्योगीले अख्तियारमा उजुरी दिएका थिए । सोही उजुरीका आधारमा आयोगको टोलीले चलाएको ‘स्टिङ अपरेसन’का क्रममा यादव घुस रकमसहित फेला परेका हुन् । नियन्त्रणमा लिइएका यादवमाथि थप अनुसन्धान भइरहेको आयोगले जनाएको छ ।
