मर्चवार । रुपन्देहीको कोटहीमाई गाउँपालिकाले आर्थिक वर्ष २०८१/०८२ मा विकास निर्माण, सामाजिक सेवा र सुशासनका क्षेत्रमा उत्साहजनक कार्यसम्पादन गरेको छ। पालिकाले तय गरेका कुल ३ सय ७० योजनामध्ये ३ सय ५५ वटा सम्पन्न गर्दै आफ्नो सक्रियता पुष्टि गरेको छ ।
भौतिक पूर्वाधारतर्फ विशेष फड्को मार्दै पालिकाले १४.२ किलोमिटर ग्राभेल सडक, ३.९५ किलोमिटर पीसीसी सडक र २.४५ किलोमिटर नाली निर्माण गरेको छ। साथै, खानेपानी तथा सिँचाइका लागि २ सय २४ थान बोरिङ र २ सय ६० वटा ह्याण्डपम्प जडान गर्नुका साथै ३७ वटा विद्यालय र १७ वटा मठमन्दिरको मर्मत सम्भार सम्पन्न गरेको छ ।
शिक्षा र स्वास्थ्यको क्षेत्रमा पनि पालिकाको उपस्थिति प्रभावकारी देखिएको छ। १४ वटा सामुदायिक र १३ वटा निजी विद्यालयसहितको शैक्षिक संयन्त्रमार्फत १ सय ५६ शिक्षक–कर्मचारीले सेवा दिइरहेका छन्। स्वास्थ्यतर्फ ४४ हजार ६ सय ३२ जनाले स्वास्थ्य सेवा लिएका छन् भने १० हजार ७ सय ४० जनाले आयुर्वेद उपचार प्राप्त गरेका छन् ।
पालिकाले प्रसूति केन्द्र, गाउँघर क्लिनिक र खोप केन्द्रमार्फत नागरिकको घरदैलोमै स्वास्थ्य सेवा पुर्याएको छ। यसैगरी, रोजगार सेवा केन्द्रमार्फत ३५ जनाले प्रत्यक्ष रोजगारी पाएका छन् भने ६५ जनालाई वैदेशिक रोजगारसँग सम्बन्धित परामर्श र सहयोग प्रदान गरिएको छ ।
सामाजिक सुरक्षा र लक्षित वर्गको हितमा पालिकाले ३ हजार ९ सय ४७ जनालाई सामाजिक सुरक्षा भत्ता वितरण गरेको छ भने ३९ जना अपाङ्गता भएका व्यक्तिहरूलाई परिचयपत्र उपलब्ध गराएको छ। कृषि र पशुपालनलाई प्राथमिकता दिँदै १३ हजार २ सय ७२ किसान परिवारलाई विभिन्न अनुदान र सामग्री वितरण गरिएको छ भने ६ हजार ५ सय ५५ पशुचौपायाको उपचार र खोप व्यवस्थापन गरिएको छ। यसका साथै नापी शाखामार्फत जग्गा विवाद समाधान र सूचना प्रविधि शाखामार्फत सुशासनका कार्यहरूलाई तीव्रता दिइएको छ ।
आर्थिक व्यवस्थापनतर्फ पालिकाले गत आर्थिक वर्षमा ६८ लाख ४० हजार २ सय ४८ रुपैयाँ राजस्व सङ्कलन गरेको छ। कुल स्वीकृत बजेटमध्ये ४१ करोड २५ लाख ३५ हजार ९ सय २१ रुपैयाँ प्राप्त भएकोमा चालु र पुँजीगततर्फ उल्लेख्य खर्च भएको छ ।
वडागत रूपमा बजेट खर्चको अवस्था ८४ देखि ९६ प्रतिशतसम्म रहेको छ, जसले पालिकाको प्रशासनिक दक्षता र पुँजीगत खर्च गर्ने क्षमतालाई स्पष्ट पारेको छ। दुईतले आफ्नै प्रशासनिक भवनबाट ८९ जना कर्मचारीमार्फत सेवा प्रवाह गरिरहेको कोटहीमाईले समग्र विकासको एउटा सकारात्मक खाका प्रस्तुत गरेको छ।
