मर्चवार । रुपन्देहीको मर्चवार लिफ्ट सिँचाइको ३१औँ वार्षिक साधारण सभामा पूर्व प्रतिनिधि सभा सदस्य प्रमोद कुमार यादवले किसानहरूलाई कुदालो वितरण गर्नुभएको छ । यादवले १ सय ३१ ब्लकका अध्यक्षहरूलाई सिँचाइ सुधारका लागि आफ्नो व्यक्तिगत लगानीमा कुदालो हस्तान्तरण गर्नुभएको हो ।
कार्यक्रममा बोल्दै प्रमुख अतिथि यादवले नहर सफाइका लागि आफ्नो व्यक्तिगत जेसीभी निःशुल्क उपलब्ध गराउने प्रतिबद्धता जनाउनुभयो। जेसीभीको इन्धन खर्च मात्र आयोजनाले बेहोर्ने गरी नहर सफाइलाई प्रभावकारी बनाउन सकिने उहाँले बताउनुभयो। मुख्य नहरबाट विभिन्न ब्लकमा जाने कुलो–नाला सफा गर्न र मर्मतका लागि पनि कुदालो वितरण गरिएको यादवले उल्लेख गर्नुभयो।
नयाँ डिपिआर अनुसार संरचना निर्माणका लागि आवश्यक समन्वय र सहयोग गर्न आफू प्रतिबद्ध रहेको बताउँदै यादवले आगामी दिनमा पनि किसान र सिँचाइ सुधारमा आफ्नो साथ र सहयोग जारी रहने विश्वास व्यक्त गर्नुभयो।
