भैरहवा । सिद्धार्थनगर नगर पालिकाले रोहिणी गाउँपालिकामा डम्पिङ्ग साईट बनाउन लागेको भन्दै नेपाली कांग्रेसको रोहिणी गाउँपालिका कार्यसमितिले बिरोध जनाएको छ । पार्टीले बुधबार एक प्रेस विज्ञप्ती जारी गर्दै रोहिणीलाई कुनै पनि अवश्थामा फोहोर पाल्ने स्थान बन्न नदिने जनाएको छ ।
नेपाली कांग्रेस रोहिणी गाउँपालिका कार्यसमिति सभापति पारसनाथ योगीको हस्ताक्षर रहेको प्रेस विज्ञप्तीमा सिद्धार्थ नगरपालिकाले रोहिणीको जनताको स्वास्थ्य संग खेलेको र धार्मिक भावनालाई आहत गर्न खोजेको आरोप लगाएको छ । यस अघि ओमसतिया र सिनपाकै मेउडिहवा लगायतका जनताको बिरोध खेपेको नगरपालिकाले रोहिणीका जनतालाई मानव नै नमानेको विज्ञप्तीमा उल्लेख छ । सर्वदलिय सहमतिको नाममा ओमसतिया गाउँपालिका र सिद्धार्थनगरको फोहोरलाई रोहिणी नेपाली कांग्रेसले कुनै पनि हालतमा स्विकार नगर्ने बताईएको छ ।
सिद्धार्थनगर नगर पालिकाले ओमसतिया गाउँपालिका वडा नम्बर ५ मा फोहोर प्रशोधनको लागि जग्गा खरिद गरे पनि स्थानियहरुको चर्को बिरोधको कारण परियोजना रद्द गर्नुपरेको थियो । अहिले सिद्धार्थनगर पालिका सहित रोहिणी गाउँपालिका र ओमसतिया गाउँपालिकाको फोहोर संयुक्त रुपमा रोहिणी गाउँपालिकाको वडा नम्बर २ मैनिहवा नजिक ब्यवस्थापन गर्ने चर्चा चलेको छ । सोही क्षेत्रमा मैनिहवा गाउँ र प्रसिद्ध रामजानकी मन्दिर रहेको भन्दै स्थानियहरुले यसको बिरोध सुरु गरेका छन् ।
