अर्घाखाँची । अर्घाखाँचीको नरपानी प्रहरी चौकीमा नयाँ सरुवा भई आउनुभएका प्रहरी वरिष्ठ नायब निरीक्षक प्रवीन आचार्यले शान्ति सुरक्षा कायम गर्न कुनै कसर बाँकी नराख्ने प्रतिबद्धता व्यक्त गर्नुभएको छ। स्थानीय जनप्रतिनिधि, व्यवसायी र समाजसेवीहरूसँगको परिचयात्मक तथा अन्तरक्रिया कार्यक्रममा बोल्दै आचार्यले समाजमा शान्ति सुरक्षा कायम गर्न प्रहरीको एकल प्रयास पर्याप्त नहुने भन्दै सबैको सहकार्य आवश्यक रहेकोमा जोड दिनुभयो।
उहाँले सुपादेउराली नरपानी क्षेत्र पर्यटकीय दृष्टिकोणले महत्वपूर्ण रहेको बताउँदै, प्रहरी जनताको सेवामा समर्पित भएर काम गर्ने प्रतिबद्धता जनाउनुभयो। आचार्यले चोरी, तस्करी, लुटपाट, मानव बेचबिखन र लागुपदार्थ दुर्व्यसनीजस्ता आपराधिक घटनाहरू रोक्न स्थानीय जनप्रतिनिधि तथा सरोकारवाला निकायको महत्वपूर्ण भूमिका हुने बताउनुभयो।
कार्यक्रममा सन्धिखर्क नगरपालिका वडा नं. ६ का अध्यक्ष श्रीधर महत्रा क्षेत्री र वडा नं. ७ का अध्यक्ष चुरा ब. केसीले पनि शान्ति सुरक्षा कायम गर्न सबैको सामाजिक उत्तरदायित्व र सहकार्यमा जोड दिनुभयो। कार्यक्रममा पूर्व जनप्रतिनिधि, वडा सदस्य, समाजसेवी, बुद्धिजीवी र स्थानीय व्यवसायी लगायतको उपस्थिति थियो।
