भैरहवा । बाढी र पहिरोका कारण सडक यातायात अवरुद्ध भएपछि रुपन्देहीको भैरहवा क्षेत्रमा अलपत्र परेका यात्रुहरूका लागि नेपाल वायुसेवा निगमले आज दिउँसो चार्टर्ड उडान सञ्चालन गर्ने भएको छ। यसअघि आइतबार राति ९ बजेका लागि तय भएको उडान प्राविधिक कारणले स्थगित भएको थियो ।
निगमले जारी गरेको सूचना अनुसार, काठमाडौंबाट भैरहवाका लागि दिउँसो १ बजे र भैरहवाबाट काठमाडौंका लागि २:४५ बजे उडान तालिका तय गरिएको छ। काठमाडौं-भैरहवाको भाडा ५ हजार रुपैयाँ र भैरहवा-काठमाडौंको भाडा ७ हजार रुपैयाँ निर्धारण गरिएको छ।
गौतमबुद्ध अन्तर्राष्ट्रिय विमानस्थल कार्यालयका सूचना अधिकारी विनोद सिंह राउतका अनुसार, अलपत्र परेका यात्रुहरू, बिरामी र वैदेशिक रोजगारीमा जाने व्यक्तिहरूलाई लक्षित गरी १५८ सिट क्षमताको एयरबस ३२० जहाजबाट यो विशेष उडान सञ्चालन गरिनेछ। यस उडानले धेरै यात्रुहरूलाई राहत प्रदान गर्ने अपेक्षा गरिएको छ।
