काठमाडौं । अन्तर्राष्ट्रिय मगर महासंघले मगरात सभ्यताको विकास र प्रबर्द्धनको लागि ‘मगरात समृद्धि मिशन सन् २०३० ’ बनाउने भएको छ ।
सोमबार काठमाडौंमा पत्रकार सम्मेलनको आयोजना गर्दै महासंघले यही चैत्र ९ र १० गतेको सेमिनारका निर्णय सार्वजनिक गर्दै गरिबी र आर्थिक पछौटेपनवाट मुक्त हुन सामूहिक लगानीमा कर्पोरेट उद्यमशिलता विकास गर्ने लक्ष्य लिएको जनाएको हो ।
त्यस्तै, महासंघले सन् २०३० सम्म शिक्षित मगर समाजको लागि मगर युवाहरुलाई गुणस्तरीय शिक्षामा जोड दिने, मगरहरुको राजनीतिक सीमान्तीकरणलाई अन्त्य गर्न राजनीतिक नेतृत्व र पहुँचको वृद्धि गर्न पहल गर्नेलगायत निर्णय भएको जनाएको छ ।
मगर जातिको सामाजिक राजनीतिक इतिहासको पुनर्लेखन गर्न एक करोड रुपैयाँको मगर अनुसन्धान फण्ड स्थापना गर्ने निर्णय गरिएको पत्रकार सम्मेलनमा जानकारी दिइएको छ ।
त्यसैगरी अन्तर्राष्ट्रिय मगर महासंघको आयोजनामा मगरहरुको अन्तर्राष्ट्रिय महासम्मेलन सन् २०२५ मा भारतमा गर्ने निर्णय गरिएको बताइएको छ ।
‘नेपालभित्र र संसारभर चलिरहेको जातीय पहिचान र मानव अधिकार, सामाजिक न्याय, समानता र समावेशी लोकतन्त्र पक्षधर राष्ट्रिय अन्तर्राष्ट्रिय आदिवासी संघ संगठनहरु र संयुक्त राष्ट्रसंघसँग सहकार्य, ऐक्यबद्धता र सम्बन्ध विस्तार गर्दै आदिवासी जनजातिका सवालमा विभिन्न देशका सरकारहरुद्वारा गरिएका सन्धि सम्झौता कार्यन्वयनका लागि प्रभावकारी पहल गरिनेछ ।
मगरात सभ्यता र मगर पहिचानको आधारमा संसारभरका मगर एकतालाई थप मजबुद र बलियो बनाउने संकल्प गर्दछौं । प्रेमिनार सम्पन्न गर्न आर्थिक नैतिक तथा भौतिक सहयोग गर्ने सबैलाई हार्दिक धन्यवाद ज्ञापन गरिएको छ,’ अन्तर्राष्ट्रिय मगर महासंघ, कार्यकारी परिषद अध्यक्ष र बेल्जियम महासचिव विरभान घर्तीमगरद्धारा जारी विज्ञप्तिमा उल्लेख गरिएको छ ।
