अर्घाखाँची । अर्घाखाँचीको शितगंगा नगरपालिकाले स्थानीय बासिन्दाको सुविधाका लागि नयाँ व्यवस्था लागू गरेको छ । अब योजना सम्झौताका लागि पालिकाको कार्यालय धाइरहनु पर्ने छैन, वडा कार्यालयबाटै सबै प्रक्रिया पूरा गर्न सकिनेछ। यसले स्थानीयको समय र भाडा खर्च बचत हुने भएको छ ।
स्थानीय रेसम बन्जाडेका अनुसार, यो व्यवस्थाले सेवा सहज भएको छ । नगरपालिकाले योजना सम्झौताका साथै उपभोक्ता समितिलाई विस्तृत प्रशिक्षण पनि दिएको छ । योजना अधिकृत नुमलाल खनालले गुणस्तरीय काम, लागत अनुमान र प्राविधिक समन्वयका बारेमा प्रशिक्षण दिएका थिए।
नगरपालिकाले आवश्यक फाराम, सूचनापुस्तिका र मार्गदर्शन सामग्री उपभोक्ता समितिलाई वितरण गरेको छ। वडा अध्यक्ष केशव बेल्वासेको अध्यक्षता र प्रमुख प्रशासकीय अधिकृत कृष्णप्रसाद सापकोटाको प्रमुख आतिथ्यमा सम्पन्न अभिमुखीकरण कार्यक्रममा वडा अध्यक्ष बेल्वासेले गुणस्तरीय कार्यान्वयनका लागि दक्ष श्रमशक्ति र समयमै अनुगमनमा जोड दिए ।
यस वर्ष वडा नम्बर १० मार्फत ठेक्का तथा नियमित कार्यक्रम बाहेक १४ वटा योजना सञ्चालन गरिनेछ । वडास्तरमै योजना सुरु गर्न सकिने भएकाले समयमै काम सम्पन्न र गुणस्तर सुनिश्चित गर्न सजिलो हुने अपेक्षा गरिएको छ। यो कदमलाई नागरिकमैत्री र प्रभावकारी सार्वजनिक सेवा अभ्यासको रूपमा लिइएको छ।
