भैरहवा । जिल्ला प्रहरी कार्यालय रुपन्देहीले आर्थिक वर्ष २०८१÷०८२ मा भन्सार छली तथा अवैध चोरी निकासी नियन्त्रणमा ऐतिहासिक सफलता हात पारेको छ । प्रहरीले यस अवधिमा १२ करोड ६७ लाख ७१ हजार ७७९ रुपैयाँ बराबरको अवैध सामान बरामद गर्नुका साथै तस्करीमा संलग्न ११३ जनालाई पक्राउ गरेको छ । यो सफलताले सीमा क्षेत्रमा हुने अवैध कारोबार नियन्त्रणमा प्रहरीको सक्रियतालाई पुष्टि गरेको सरोकारवालको भनाइ छ ।
जिल्ला प्रहरी कार्यालयका प्रमुख, प्रहरी उपरीक्षक (एसपी) प्रदीप बहादुर क्षेत्रीका अनुसार, कार्यालय तथा मातहतका प्रहरी इकाईहरूबाट खटिएको विशेष टोलीले भारतबाट नेपालतर्फ अवैध रूपमा ल्याउन लागेको समानहरु बरामद गरेको हो । बरामद गरिएका सामानहरूमा पशुपंक्षी देखि किराना, विद्युतीय सामग्री, कपडा, र अन्य घरायसी सामग्रीहरू रहेका छन् ।
यस बृहत कारबाहीको क्रममा प्रहरीले तस्करीमा प्रयोग भएका ३३१ वटा सवारी साधन समेत नियन्त्रणमा लिएको छ । जसमा ३०२ वटा मोटरसाइकल, ८ वटा ट्रक, १७ वटा पिकअप, ३ वटा अटो रिक्सा र एउटा ट्याक्टर रहेका छन् ।
एसपी क्षेत्रीले बरामद गरिएका सम्पूर्ण सामान, पक्राउ परेका व्यक्तिहरू र नियन्त्रणमा लिइएका सवारी साधनलाई आवश्यक अनुसन्धान र कारबाहीका लागि भैरहवा भन्सार कार्यालय बेलहिया, पशु क्वारेन्टाइन चेकपोस्ट बेलहिया र राजस्व अनुसन्धान कार्यालय बुटवलमा पठाइएको जानकारी दिए ।
भन्सार छली नियन्त्रणका साथै जिल्लाको समग्र शान्ति सुरक्षा र अपराध नियन्त्रणमा पनि रुपन्देही प्रहरीले उल्लेखनीय प्रगति गरेको छ । चालु आर्थिक वर्षमा जिल्लाभर कूल १७०७ वटा मुद्दा दर्ता भएकोमा ११४५ वटा मुद्दा फस्र्यौट भइसकेको छ भने ५६२ वटा मुद्दा अनुसन्धानको प्रक्रियामा रहेका छन् । यो तथ्याङ्कले प्रहरीको मुद्दा फस्र्यौट दर प्रभावकारी रहेको देखाउँछ ।
गत वैशाखमा जिल्ला प्रहरी कार्यालय रुपन्देहीको नेतृत्व सम्हालेका एसपी क्षेत्रीको आगमनसँगै सीमा क्षेत्रमा हुने अवैध कारोबार र अपराध नियन्त्रणमा प्रहरीले आक्रामक रणनीति अपनाएको स्थानीयले बताएका छन् । प्रहरीको यस सक्रियताले जिल्लामा राजस्व संकलनमा समेत सकारात्मक प्रभाव पार्ने र आपराधिक गतिविधिमा कमी आउने अपेक्षा गरिएको छ ।
