जनकपुर । करिब डेढ करोडको लागतमा जनकपुरधामको ऐतिहासिक राम मन्दिरको सौन्दरीकरण हुन लागेको छ । मन्दिरको प्रवेशद्वारदेखि परिसरभित्रको पार्क निर्माण लगायतका कामहरु गरिने भएको छ ।
सौन्दरीकरणका लागि मधेश प्रदेश सांसद दीपेन्द्र ठाकुरले संसदीय कोषबाट पचास लाख रुपैयाँ दिने भएका छन भने जनकपुरधाम उपमहानगरपालिकाले ५० लाख र प्रतिनिधी सभा सदस्य मनिष झाले पनि संसदीय कोषबाट रु पचास लाख रुपैयाँ दिने भएका छन् ।
सो क्रममा शनिबार राम मन्दिरको दक्षिणपट्टि निर्माण हुने भनिएको प्रवेशद्वारको सांसद ठाकुर र जनकपुरधाम उपमहानगरपालिकाका प्रमुख मनोज कुमार साहले संयुक्तरूपमा सिलान्यास गरेका छन् ।
जनकपुरधामका धार्मिक तथा पर्यटकीय स्थलहरुमध्येको एक प्रसिद्ध मन्दिर हो राममन्दिर । प्रवेशद्वार निर्माणले पर्यटक र भक्तजनका लागि थप आकर्षण थप्ने महावीर युवा कमिटीका अध्यक्ष अजय गुप्ताले बताए । उनले पहिले चरणमा प्रवेशद्वारा निर्माण सम्पन्न भएपछि दोस्रो चरणमा पार्क निर्माण हुने जानकारी दिए । अहिले हजारौं आन्तरिक तथा भारतीय पर्यटकहरु राम मन्दिर दर्शन गर्न दिनहु आउने गरेका छन् ।
