भैरहवा । रुपन्देहीको सिद्धार्थनगर नगरपालिका–१२ स्थित खड्का खाजाघरबाट नक्कली भारतीय नोटसहित दुई जना भारतीय नागरिकलाई प्रहरीले नियन्त्रणमा लिएको छ। उक्त खाजाघरमा नक्कली नोटको कारोबार भइरहेको भन्ने विशेष सूचनाका आधारमा वडा प्रहरी कार्यालय भैरहवाबाट खटिएको प्रहरी टोलीले छापा मार्दा उनीहरूलाई पक्राउ गरेको हो। पक्राउ परेकाहरूको साथबाट रु ५०० दरका १४० थान गरी जम्मा ७० हजार नक्कली भारतीय रुपैयाँ बरामद गरिएको छ।
यसैगरी प्रहरीले उनीहरूको साथबाट सक्कली भारतीय मुद्रा दुई हजार सात सय ५८, नेपाली रुपैयाँ दुई हजार एक सय ८० र दुई थान मोबाइल फोनसमेत बरामद गरेको छ। पक्राउ परेका दुवै जनामाथि थप अनुसन्धान तथा आवश्यक कानुनी कारबाही प्रक्रिया अगाडि बढाइएको जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक (डिएसपी) कृष्णकुमार चन्दले जानकारी दिनुभयो।
