मर्चवार । सम्मरीमाई गाउँपालिका वडा नम्बर ६ मा रहेको असुरैना माध्यमिक विद्यालयमा सरस्वती मूर्तिको प्राण प्रतिष्ठा गरिएको छ । गाउँपालिकाका पूर्व अध्यक्ष जितेन्द्रनाथ शुक्ल (बब्लु) को सक्रियतामा बिद्यालयको लागि सरस्वती मूर्ति खरिद गरि प्राण प्रतिष्ठा गरिएको हो ।
प्राण प्रतिष्ठा अघि मूर्तिलाई असुरैना, करौता, सेमरा, बिचौवापुर, बेतकुईया हुदै पुनः असुरैना ल्याई बिद्यालयमा मूर्तिलाई स्थापना गरिएको हो । स्थानिय गाउँसमाजको सहयोगमा बिद्यालयमा अधुरो मन्दिर निर्माण गरि मूर्ति राखिएको छ । पूर्व गाउँपालिका अध्यक्ष शुक्लले आफ्नो निजि लगानी ४८ हजार रुपैयामा मूर्ति खरिद गरि बिद्यालयलाई हस्तान्तरण गरेका थिए ।
वडा नम्बर ६ का वडा अध्यक्ष तौलन केवटको अध्यक्षता, तथा पूर्व गाउँपालिका अध्यक्ष बब्लु शुक्लको प्रमुख आतिथ्यतामा सम्पन्न कार्यक्रममा बोल्दै प्रमुख अतिथि शुक्लले आफ्नो कार्यकालमा पालिकामा शिक्षाले फड्को मारेको बताए । आफ्नै कार्यकालमा असुरैना विद्यालयले माध्यमिक तहको मान्यता पाएकोले यसमा बिशेष लगाव रहेको उनले बताए । अझै पनि मौका पाए पालिकामा शिक्षाको विकासको लागि आफु लाग्ने उनले प्रतिवद्धता जनाए । कार्यक्रममा विद्यालयका प्रधान अध्यापक शेषनाथ कुर्मि, पूर्व बिद्यालय ब्यवस्थापन समिति अध्यक्ष जैस मोहम्मद खाँन, लगायतको उपस्थिति रहेको थियो ।
