भैरहवा । जारी प्रधानमन्त्री कप क्रिकेट प्रतियोगितामा नेपाल पुलिस क्लब एक खेल खेल्न बाँकी हुदै फाईनल पुगेको छ । मंगलबार भएको खेलमा पुलिसले कर्णाली प्रदेशलाई हराउदै फाईनल यात्रा सुनिश्चित गरेको हो ।
दाङ्ग लमहीको देउखुरी क्रिकेट रङ्गशालामा पुलिसले कर्णाली प्रदेशलाई ४४ रनले पराजित गरेको छ । पुलिसले दिएको १४७ रनको लक्ष्य पछ्याउदै कर्णाली प्रदेश २४ ओभरमा सबै विकेट गुमाउदै १०३ रनमै खुम्चिएको थियो । कर्णालीको लागि रविन्द्र शाहीले ४९ रन र अर्जुन घर्तिले ३० बनाउदा अन्य ब्याट्सम्यानहरु दोहोरो अंक समेत जोड्न सकेनन् ।
पुलिस क्लबका लागि म्यान अफ द म्याच समेत रहनुभएका ललित राजबंशीले ९ ओभरमा ४१ रन खर्चिदै ६ विकेट लिए । यसै गरि सागर ढकालले २ र करण केसीले १ विकेट लिए ।
यस अघि टस हारेर ब्याटिङको निम्तो पाएको पुलिसले ४८ ओभरमा सबै विकेट गुमाउदै १४७ रन बनाएको थियो । पुलिसका लागि अर्जुन साउदले ३६ रन, दिलिपनाथले ३४ रन र सागर ढकालले अविजित २२ रन बनाए ।
बलिङमा कर्णाली प्रदेशका अनुज चुनाराले ४, दिवन पुनले ३ विकेट र दिनेश अधिकारी, दिपेन्द्र रावत तथा सुनिल धमलाले समान १/१ विकेट लिए ।
प्रधानमन्त्री कप क्रिकेट प्रतियोगितामा ८ खेल खेलेको नेपाल पुलिस क्लब अविजित रहदै १६ अंक बटुलेर शिर्ष स्थानमा रहेको छ । यस्तै ८ खेल नै खेलेको त्रिभुवन आर्मी भने ७ मा जित सहित १४ अंक लिई दोश्रो स्थानमा रहेको र ८ खेल नै खेलेको शसस्त्र ६ मा जित सहित १२ अंक लिएर तेश्रो स्थानमा रहेको छ । यस्तो अवश्थामा बिहिबार हुने नेपाल पुलिस क्लब र त्रिभुवन आर्मी बिचको खेलमा पुलिस पराजित भए पनि १६ अंक पाएको उसलाई फाईनल पुग्न कुनै बाधा पुग्ने छैन । सो खेलमा आर्मी विजयी भए आर्मीको पनि १६ अंक हुनेछ र शनिबार भैरहवा स्थित सिद्धार्थ क्रिकेट रङ्गशालामा आर्मी र पुलिस बिच फाइनल खेल हुनेछ । यसै गरि शसस्त्र प्रहरी बलले पनि फाईनल पुग्ने आशा कायमै राखेको छ । तर शसस्त्र फाइनल पुग्न बिहिबारको खेल आर्मीले हार्नुपर्ने हुन्छ भने भोली कोशी प्रदेश संग हुने शसस्त्रको टिमलाई राम्रो रनरेट सहित जित्नै पर्ने बाध्यता रहेको छ ।
यसै बिच बिहिबार रूपन्देहीको एक्स्ट्राटेक ओभल क्रिकेट रङ्गशालामा भएका खेलमा मधेश प्रदेशले सुदूर पश्चिम प्रदेशलाई ४४ रनले हराएको छ । १०३ रनको लक्ष्य पछ्याएको सुदूर पश्चिम २९ ओभरमा आफ्ना सबै विकेट गुमाउदै ५८ रन मात्र बनाउन सक्यो । सुदूरका लागि हेमन्त धामीले सर्वाधिक १९ रन बनाउदा अन्य कुनै पनि ब्याट्सम्यानले दोहोरो अंकमा रन जोड्न सकेनन् ।
बलिङमा मधेश प्रदेशका बिशाल पटेलले ६ विकेट लिए । यस्तै प्रदिप पासवानले ३ विकेट र रुपेश सिंहले १ विकेट लिए ।
यस अघि टर हारेर ब्याटिङको निम्तो पाएको मधेश प्रदेशले ४२.३ ओभरमा सबै विकेट गुमाउदै १०२ रन बनाएको थियो । मधेशका लागि प्रदिप पासवानले अविजित रहदै सर्वाधिक २३ रन बनाउदा पवन सर्राफले १९ रन तथा दिपेश दास र रुपेश सिंहले समान १२/१२ रनको योगदान गरे ।
बलिङ तर्फ सुदूर पश्चिम प्रदेशका हेमन्त धामी र शेर मल्लले समान ४/४ विकेट लिदा नारायण जोशी र विकास आग्रीको नाममा १/१ विकेट रह्यो ।
प्रतियोगितामा मधेश प्रदेश एक खेल खेल्न बाँकी रहेको छ भने ९ खेल खेली सकेको सुदूरपश्चिम ६ अंक प्राप्त गरि प्रतियोगिताबाट बाहिरिएको छ ।
भोलीको खेल सिद्धार्थ क्रिकेट रङ्गशालामा कोशी प्रदेश र बिभागीय टोली शसस्त्र प्रहरी बिच हुनेछ ।
