काठमाडौं । नेपालले पीएनजीलाई ८५ रनले पराजित गर्दै हङकङमा जारी त्रिकोणात्मक टी-२० क्रिकेटको फाइनलमा प्रवेश गरेको छ । घरेलु टोली हङकङसँग बर्षाका कारण खेल रद्द भएपछि अंक बाँडेको नेपाल मंगलबारको खेलमा विजयी भएसँगै फाइनलमा पुगेको हो ।
मंगलबारको खेलमा टस हारेर पहिला ब्याटिङ गरेको नेपालले निर्धारित ओभरमा ६ विकेट गुमाएर १९८ रन बनाएको थियो । नेपालका लागि कुशल भुर्तेल र विनोद भण्डारीले ओपनिङ गरेका थिए । यो जोडीले पहिलो विकेटका लागि ६४ रनको साझेदारी गर्दै बलियो सुरुआत दिलाएका थिए ।
विकेट किपर ब्याटर भण्डारीले २२ बलमा २७ रन बनाउँदा एक छक्का र दुई चौका प्रहार गरेका थिए । तर, क्रिजमा आएका कप्तान रोहित पौडेल भने फ्लप भए । उनले चार बल फेस गर्दा एक रन बनाएर पभेलियन फर्किएपछि नेपालले ८.१ ओभरमा ६५ रन हुँदा दोस्रो विकेट गुमेको थियो ।
यसैगरी आरिफ शेखको ब्याट पनि शान्त रह्यो । उनले सात बल फेस गर्दा एक चौकाको मद्दतले चार रन जोडेर तेस्रो विकेटको रुपमा ९.३ ओभरमा ७० रन हुँदा पभेलियन फर्किए । ओपनर कुशल भुर्तेलसँग सन्दीप जोराले साझेदारी गर्दै नेपालको स्कोर अघि बढाएका थिए । नेपालको स्कोर १४.३ ओभरमा १२० रन पुगेका बेला कुशल व्यक्तिगत ५९ रनको अर्धशतकीय पारि खेल्दै पभेलियन फर्किए ।
उनले चार छक्का र चार चौका प्रहार गरेका थिए । आक्रामक पारि खेलेका सन्दीप जोराले २६ बलमा चार छक्का र तीन चौकासहित ५६ रन जोडेर आउट भएका थिए । सन्दीप आउट हुँदा नेपालले १७.५ ओभरमा १६० रन बनाएको थियो । छैटौं विकेटको रुप्मा लोकेश बम रनआउट भएका थिए । उनले छ बल फेस गर्दा दुई छक्काको मद्दतले १४ रन बनाएका थिए ।
गुलसन झा र विवेक यादवले नेपालको स्कोर दुई सय नजिक लगेका थिए । झाले ज्ञद्द बलमा १५ रन बनाउँदा एक छक्का प्रहार गरेका थिए भने विवेक यादवले चार बलमा १९ रनको आक्रमक पारि खेले । उनले तीन छक्का प्रहार गर्दा नेपालले निर्धारित ओभरमा छ विकेट गुमाएर १९८ रन बनाएको थियो ।
पीएनजीका लागि असद भालाले दुई विकेट लिँदा नोसिना पोकाना, जोन कारिको र नोरमान भानुवाले एक एक विकेट लिए ।
१९९ रनको विशाल लक्ष्यसहित मैदान उत्रिएको पीएनजी १६.१ ओभरमा ११३ रनमा रोकिए पछि नेपाल ८५ रनले विजयी भयो ।
नेपालविरुद्ध पीएनजीले सुरुआत भने मध्यम गरेको थियो । तीन ओभरमा ३२ रन जोडेको पीएनजीले पहिलो विकेट खेर फालेको थियो । टोनी उराले छ बलमा १३ रन बनाउँदा एक छक्का र एक चौका प्रहार गरेका थिए ।
दोस्रो विकेटको रुपमा सेसे बोउले १३ बलमा २१ रनको पारि खेलेर रन आउट भए । उनले एक छक्का र दुई चौका प्रहार गरे । उनलाई गुलसन झाले रनआउट गराएका थिए । कप्तान असद भाला धेरै बेर टिकेनन् । उनले ११ बलमा नौं रन बनाउँदा एक चौका प्रहार गरेका थिए । त्यसपछि हिरि हिरिले पारि सम्हाल्ने प्रयास गरे पनि ८.२ ओभरमा ७३ रन हुँदा पीएनजीले चौथो विकेट गुमाउन पुग्यो ।
उनले १९ बलमा दुई छक्का र एक चौकाको मद्दतले २८ रन बनाए । पाँचौं विकेटको रुपमा चार्लेस एमिनी नौं बलमा नौं रनको पारि खेलेर आउट भएका थिए । यस्तै, लिगा साका ११.१ र नोरमान भानुवा ११.२ ओभरमा खाता नखोली कुशल भुर्तेलले आउट गरेपछि पीएनजी दबाबमा आएका थिए ।
१४ औं ओभरमा १०२ रन पुग्दा पीएनजीले आठौं विकेट गुमाएको थियो । पीएनजीका किपलिन डोरिगा आठ रन बनाएर आउट भएका थिए । पीएनजीले ११२ रनमा नवौं विकेट गुमाएको थियो ।
नवौं विकेटको रुप्मा नोसिना पोकाना १० बलमा १२ रन बनाएर आउट भए । उनले एक छक्का प्रहार गरेका थिए । अन्तिम विकेटको रुपमा जोन कारिको दुई रन बनाएर रन आउट भए ।
नेपालका कुशल भुर्तेलले चार ओभर बलिङ गर्दा १२ रन खर्चिएर चार विकेट लिए । यस्तै, प्रतिश जिसी भने महँगो सावित भए । उनले चार ओभरमा ४० रन खर्चिएर दुई विकेट हात पारेका थिए । आकाश चन्दले तीन ओभरमा १६ रन खर्चिएर एक विकेट लिँदा, करण केसीले दुई ओभरमा २४ रन खर्चिए । रोहित पौडेलले दुई ओभरमा १२ रन खर्चिएका थिए । गुलसन झाले एक ओभरमा सात रन खर्चिएर एक विकेट हात पारे ।
त्रिकोणात्मक टी २० सिरिज अन्तर्गत मंगलबार (आजै) पीएनजी र हङकङबीच प्रतिस्पर्धा हुने छ । उक्त खेलको विजेताले उपाधिका लागि बुधबार नेपालसँग खेल्ने छ ।
