जनकपुरधाम । जिल्ला प्रहरी कार्यालय धनुषाले आज भन्सार छलेर ल्याइएका रु २३ लाखभन्दा बढी मूल्य बराबरका समान र इभी भ्यानसहित एक जनालाई पक्राउ गरेको छ । जिल्ला प्रहरी कार्यालयका अनुसार गोप्य सूचनाका आधारमा खटिएको प्रहरी टोलीले जनकपुरधाम उपमहानगरपालिका–८ रत्नसागरबाट भन्सार छलेर ल्याइएको २८ कार्टुन बिस्कुट, ११८ प्याकेट नरिवल चकलेट र सो समान बोकेको बाप्र०६–००१ज ००८४ नम्बरको इभी भ्यान नियन्त्रणमा लिएको हो ।
रत्नसागरबाट मुजेलियातर्फ जाँदै गरेको इभीलाई रोकेर जाँच गर्दा भन्सार छलेर ल्याइएको उक्त समान बरामद भएपछि समान र इभी गाडीसहित चालक सिरहाको मिर्चैया नगरपालिका–९ धर्मपुर निवासी २० वर्षीय बाबुराम लिम्बूलाई पक्राउ गरिएको जिल्ला प्रहरी कार्यालयका प्रवक्ता एवं प्रहरी नायब उपरीक्षक मधुसुदन न्यौपानेले जानकारी दिनुभयो । बरामद गरिएका सामान र सवारीसाधनको अनुमानित मूल्य रु २३ लाख ३० हजार रहेको प्रहरी नायब उपरीक्षक न्यौपानेले बताउनुभयो । बरामद भएका समान र इभीलाई आवश्यक कारबाहीका लागि जिल्ला भन्सार कार्यालय जनकपुरधाममा बुझाइएको प्रहरीले जनाएको छ ।
