नवलपरासी । नवलपरासी (बर्दघाट–सुस्तापश्चिम) निर्वाचन क्षेत्र नम्बर १ मा राष्ट्रिय स्वतन्त्र पार्टी (रास्वपा)का उम्मेदवार विक्रम खनाल सानदार मतका साथ प्रतिनिधिसभा सदस्यमा निर्वाचित भएका छन् । नेपाली कांग्रेसका उम्मेदवार विनोदकुमार चौधरीलाई निकै फराकिलो मतान्तरले पराजित गर्दै खनाल सांसद चुनिएका हुन् ।
गत बिहीबार सम्पन्न प्रतिनिधिसभा सदस्य निर्वाचनको सार्वजनिक अन्तिम मतपरिणामअनुसार विजयी खनालले ४५ हजार २४१ मत प्राप्त गरेका छन् । उनका निकटतम प्रतिद्वन्द्वी नेपाली कांग्रेसका चौधरीले भने जम्मा ९ हजार ५०२ मत मात्र ल्याउन सके । रास्वपाका खनालले कांग्रेसका चौधरीलाई ३५ हजार ७३९ को भारी मतान्तरले स्तब्ध पारेका हुन् ।
यस क्षेत्रमा अन्य पुराना तथा ठूला दलका उम्मेदवारहरुको मत पनि निकै कमजोर देखिएको छ । निर्वाचन अधिकृतको कार्यालयले दिएको जानकारीअनुसार तेस्रो स्थानमा रहेका नेकपा (एमाले)का उम्मेदवार रामप्रसाद पाण्डेयले ७ हजार ९५६ मत प्राप्त गरेका छन् । त्यसैगरी जनता समाजवादी पार्टी (जसपा) नेपालका उम्मेदवार हृदयेश त्रिपाठीले ७ हजार ८३२ मतमै चित्त बुझाउनु परेको छ ।
