कञ्चन । आगामी फागुन २१ गते हुने प्रतिनिधिसभा सदस्य निर्वाचनका लागि नेपाल मजदुर किसान पार्टी (नेमकिपा) का तर्फबाट रुपन्देही क्षेत्र नं. ५ का उम्मेदवार जगीलाल थापाले आफ्नो चुनावी प्रचारप्रसार तथा घरदैलो अभियानलाई तीव्र पारेका छन्। 'मादल' चुनाव चिह्न लिएर मैदानमा उत्रिएका थापाले गैडहवा र कञ्चनका विभिन्न गाउँ तथा बजार क्षेत्रमा पुगेर मतदातासँग मत मागिरहेका छन्। देश र जनताको निःस्वार्थ सेवा, समाजवादी अभियानको विस्तार तथा युवाहरूलाई खेलकुदमार्फत राष्ट्र निर्माणमा जोड्ने लक्ष्यसहित उनी घरदैलोमा जुटेका हुन्।
मतदाताको घरमा पार्टीको घोषणापत्रसहित पुगेका उम्मेदवार थापाले कसैको करकाप वा नातावादमा नपरी सबै पार्टीका घोषणापत्र पढेर सही र इमानदार उम्मेदवारलाई मात्र मतदान गर्न आग्रह गरेका छन्। विकासमा समान अवसर, योग्यताअनुसारको रोजगारी, निःशुल्क शिक्षा तथा स्वास्थ्य, स्वदेशमै मल कारखाना स्थापना र भ्रष्टाचारीलाई आजीवन कारावास वा मृत्युदण्डको सजाय दिने नेमकिपाको मुख्य एजेन्डा रहेको उनले बताएका छन्। साथै, देशलाई अर्बौंको ऋण र व्यापारघाटामा डुबाउने तथा सत्ताका लागि सिद्धान्तहीन गठबन्धन गर्ने शासक दलहरूलाई जनताको कठघरामा उभ्याउन यसपटक 'मादल' चिह्नमा मतदान गर्न उनले अपिल गरेका छन्। नेमकिपाले रुपन्देहीका पाँचवटै क्षेत्रमा आफ्ना उम्मेदवार उठाएको छ।
