भैरहवा । राष्ट्रिय स्वतन्त्र पार्टी भैरहवा नगर समितिको आयोजनामा शनिबार भैरहवामा रक्तदान कार्यक्रम सम्पन्न भएको छ ।
जाजरकोटमा आएको भुकम्पमा घाईतेहरुको उपचारको क्रममा रगतको माग रहेको कारण त्यसमा सहयोग पु¥याउने उद्देश्य सहित रक्तदान कार्यक्रमको आयोजना गरिएको पार्टीका नगर सभापति परशुराम पराजुलीले जानकारी दिए । उनले जाजरकोट संगै आन्तरिक रुपमा समेत रगतको आपूर्ति पूर्ति गर्ने गरि पार्टी लागेको बताए । यसको लागि अब वडा स्तरै यस्ता कार्यक्रमको आयोजना गरिने पराजुलीको भनाई छ ।
राष्ट्रिय स्वतन्त्र पार्टीका जिल्ला संयोजक बुद्धि प्रसाद शर्माको प्रमुख आतिथ्यतामा सम्पन्न कार्यक्रममा पार्टीका क्षेत्रिय सभापति ओम पौडेल, नगर कोषाध्यक्ष कृष्ण प्रसाद भण्डारी, सचिव पूनम अग्रवाल लगायतको सहभागीता रहेको थियो ।
भिम अस्पताल भैरहवामा आयोजित कार्यक्रममा २८ जनाले रक्तदान गरेको कार्यक्रम संयोजक ज्ञानेन्द्र पाण्डेले जानकारी दिए । कार्यक्रममा को प्राविधिक सहयोग भिम अस्पतालकै ब्लड बैंकको रहेको थियो ।
