धनगढी । नेपाल तेक्वान्दो संघका संस्थापक दीपराज गुरुङको तस्बिर सुदूरपश्चिम प्रदेशअन्तर्गतका सम्पूर्ण डोजाङहरुमा राखिने भएको छ । सुदूरपश्चिम तेक्वान्दो संघको शुक्रबार बसेको बैठकले संघका संस्थापक दीपराज गुरुङको तस्बिर सम्मान स्वरुप आफू अन्तर्गतका सम्पूर्ण डोजाङहरुमा राख्ने निर्णय गरेको हो ।
नेपाली तेक्वान्दोको विकासमा गुरुङले खेलेको भूमिकालाई सम्मान गर्दै उक्त निर्णय गरिएको जनाइएको छ । त्यस्तै, बैठकले धनगढीमा आउँदो चैत्र १ देखि ३ गतेसम्म राष्ट्रिय तेक्वान्दो च्याम्पियनसिप आयोजना गर्ने निर्णय समेत गरेको छ ।
च्याम्पियनसिपमा ७ प्रदेशका टोलीले सहभागिता जनाउँने संघका महासचिव पदक विक्रम सिंहले जानकारी दिए । प्रतियोगिताको संयोजक सरोज चौधरी र उपसंयोजकमा हेम बस्नेत चुनिएका छन् ।
