मुगु । रारातालको किनारमा पौडी खेल्ने क्रममा तालमा डुबेर एक जनाको मृत्यु भएको छ ।
रारातालको पुर्वी भागमा पर्ने ठाकुर नाथस्थित तालको किनारमा पौडी खेल्ने क्रममा छाँयानाथ रारा नगरपालिका –५ का २१ वर्षिय शिशिर जङ्ग रावलको डुबेर मृत्यु भएको प्रहरीले जनाएको हो ।
मृतक रावल रारा ताल किनारमा निर्माणाधिन साइकललेनमा मजदुरी गर्दै थिए । दिउँसो २ बजे कामबाट घर फर्कने क्रममा पौडी खेल्दा रावलको मृत्यु भएको उनका काका नरेन्द्र रावलले जानकारी दिए ।
घटनाको जानकारी पाउने बित्तिकै हनुमान ध्वज गुल्मबाट उद्दारका लागि नेपाली सेना घटना स्थलमा पुगेको थियो । रारा विमानस्थल र जिल्ला प्रहरी कार्यालयबाट थप प्रहरी टोली पुगि शव तालबाट बाहिर निकालिएको थियो ।
घटनाको मुचुल्का पछि शवको पोस्टमाटमका लागि जिल्ला अस्पताल लगिएको जिल्ला प्रहरी कार्यालय मुगुका प्रहरी नायब उपरीक्षक बिरेन्द्र थापाले जानकारी दिएका हुन् ।
