भैरहवा । अनाथ तथा विपन्न बालबालिकाको सहयोगार्थ आर्थिक सहयोग जुटाउने उद्देश्यले साउनको दोस्रो हप्ता भैरहवामा ‘भैरहवा कार्निभल–२०८२’ आयोजना हुने भएको छ। प्लाटिनम इभेन्ट्स प्रालि र गृहलक्ष्मी समूहको संयुक्त आयोजनामा हुने यो कार्यक्रम साउन १५, १६ र १७ गते भैरहवास्थित महेन्द्र सभागृहको खुल्ला परिसरमा सञ्चालन हुनेछ।
आयोजकका अनुसार, कार्निभलमा बृहत् नृत्य प्रतियोगिता र खाना महोत्सव मुख्य आकर्षणका रूपमा रहनेछन् । नृत्य प्रतियोगितामा भैरहवा र आसपासका क्षेत्रबाट करिब २ सय जना प्रतियोगी सहभागी हुने अनुमान छ। प्रतियोगिता जुनियर (५ देखि १५ वर्ष) र सिनियर (१६ वर्षमाथि) गरी दुई समूहमा हुनेछ। प्रतियोगिताको पहिलो अडिसन सुरु भइसकेको छ भने क्वार्टर फाइनल, सेमिफाइनल र फाइनल क्रमशः साउन १५, १६ र १७ गते हुनेछ।
प्रतियोगितामा जुनियरतर्फ प्रथम, द्वितीय र तृतीय हुनेले क्रमशः २५, १५ र १० हजार रुपैयाँ पुरस्कार पाउनेछन्। सिनियरतर्फ भने प्रथम, द्वितीय र तृतीय हुनेलाई क्रमशः ३०, २० र १० हजार रुपैयाँ पुरस्कार प्रदान गरिनेछ। प्रतियोगीको छनोट पूर्ण रूपमा निर्णायकको निर्णयमा आधारित हुने र भोटिङ प्रणाली समावेश नगरिने आयोजकले जनाएको छ। निर्णायकमा कलाकारहरू शुभम शुक्ला, वीरेन्द्र कुँवर, पुनम थापा र फाइनलमा सुजन मार्फा रहनेछन्।
कार्निभलमा विभिन्न परिकारका ३० वटा खानाका स्टल पनि रहनेछन्। कार्यक्रम हरेक दिन दिउँसो साढे ४ बजेदेखि राति १० बजेसम्म सञ्चालन हुनेछ। तीनै दिनका लागि प्रतिव्यक्ति ५ सय रुपैयाँको टिकट शुल्क तोकिएको छ। कार्यक्रमबाट बचत भएको सम्पूर्ण रकम आर्थिक अभावमा परेका बालबालिकाको सहयोगमा खर्च गरिने प्लाटिनम इभेन्ट्सका सञ्चालक ओजश शर्माले बताए।
