लुम्बिनी । लुम्बिनी विकास कोषका उपाध्यक्ष डा ल्हारक्याल लामा (खेन्पो छिमे छिरिङ)ले विश्व शान्तिका लागि धार्मिक सद्भाव आवश्यक रहेको बताउनुभएको छ । हिन्दू र बौद्ध धर्मगुरुहरूले आयोजना गरेको शान्ति–मैत्री लुम्बिनी यात्रा कार्यक्रममा आज लुम्बिनीमा बोल्दै उपाध्यक्ष डा लामाले लुम्बिनीको विकास संरक्षण र प्रवर्द्धनमा सबै धर्म र सम्प्रदायको उत्तिकै जिम्मेवारी र उत्तरदायित्व रहेको बताउनुभयो ।
उहाँले लुम्बिनीप्रति सबै धर्म मान्ने नागरिकले उत्तिकै आस्था र विश्वास रहेको बताउँदै शान्ति र अहिंसाको मार्ग अवलम्बन गर्न प्रेरणा दिएको बताउनुभयो । उपाधक्ष्य लामाले लुम्बिनी शान्ति चाहने सबैको साझा स्थल भएको र व्यक्तिगत आस्थाभन्दा माथि उठेर राष्ट्रहितका लागि धार्मिक एकता कायम गर्नुपर्नेमा जोड दिनुभयो ।
त्यस्तै विश्व ओमकार एकता महाअभियानका संयोजक डा चिन्तामणि नाथ योगीले राष्ट्र निर्माणका लागि धार्मिक एकता अपरिहार्य रहेको बताउनुभयो । नेपाल हिन्दू, बौद्ध, किरात, जैन, बोनलगायत विविध धार्मिक समुदायको साझा भूमि भएको उल्लेख गर्दै उहाँले सहअस्तित्व र सहकार्यमा बस्नुपर्नेमा जोड दिनुभयो । सङ्गत संस्कृति अभियानका प्रमुख पुष्पराज पुरुषले भगवान् बुद्धको जन्मस्थल सम्पूर्ण नेपालीको साझा धरोहर भएको बताउँदै धार्मिक भावना भएका प्रत्येक व्यक्तिले जीवनमा कम्तीमा एकपटक लुम्बिनीको भ्रमण गर्नुपर्ने धारणा राख्नुभयो ।
