सिद्धार्थनगरमा जथाभावी फोहोर फाल्नेलाई ५ हजार जरिवाना, नगर प्रहरीद्वारा कडा निगरानी

भैरहवा । सिद्धार्थनगर नगरपालिकाले सडक तथा सार्वजनिक स्थानमा जथाभावी फोहोर फाल्ने प्रवृत्तिलाई निरुत्साहित गर्न विशेष अभियानलाई तीव्रता दिएको छ। बैशाखदेखि सचेतनामूलक कार्यक्रम सञ्चालन गर्दै आएको नगरपालिकाले अटेरी गर्नेहरूमाथि अब जरिवानासहितको कारबाही अगाडि बढाएको हो।

नगरपालिकाले पछिल्लो समय नगरका विभिन्न स्थानमा रातको समयमा समेत नगर प्रहरी परिचालन गरी छड्के अनुगमन गरिरहेको छ। यसै क्रममा, बिहीबार साँझ जथाभावी फोहोर फाल्दै गर्दा रंगेहात पक्राउ परेका एक व्यक्तिलाई ५ हजार रुपैयाँ जरिवाना गरिएको छ। ती व्यक्तिले नगर प्रहरीलाई समेत अभद्र व्यवहार देखाएका थिए। पछि वडा प्रहरी कार्यालय, भैरहवाको सहयोगमा उनलाई भविष्यमा त्यस्तो गल्ती नगर्ने सर्तमा माफी मगाएर जरिवाना तिराई छाडिएको नगरपालिकाका प्रशासन महाशाखा प्रमुख देव ज्ञवालीले जानकारी दिनुभयो।

"नगरलाई सफा, सुन्दर र हरियाली बनाउने हाम्रो अभियान हो," नगर प्रमुख इश्तियाक अहमद खानले भन्नुभयो, "तर कतिपयले अटेरी गरी रातको समयमा लुकेर फोहोर फाल्ने गरेको पाइयो। त्यसैले सचेतना, फोहोर उठाउन लगाउने र जरिवाना एकसाथ अघि बढाएका छौं।" उहाँले नगरलाई क्लिन, ग्रीन र वातावरण मैत्री बनाउने अभियानमा सम्पूर्ण नगरवासीको साथ र सहयोग अपरिहार्य रहेको बताउनुभयो।

नगरपालिकाले नगरवासीलाई जथाभावी फोहोर नफाल्न र नगरपालिकाको फोहोर संकलन गर्ने ट्याक्टरमा मात्र फोहोर फाल्ने बानी बसाल्न आग्रह गर्दै विभिन्न चोक तथा सार्वजनिक स्थानमा सचेतनामूलक ब्यानरहरू समेत राखेको छ। फोहोरमैला व्यवस्थापन ऐन, २०६८ अनुसार नगरपालिकाले कसुरको प्रकृति हेरी ५० हजार रुपैयाँसम्म जरिवाना गर्न सक्ने अधिकार राख्दछ। पछिल्लो दुई महिनामा जथाभावी फोहोर फाल्ने १८ जनालाई कारबाही गरिएको र उनीहरूबाट ५ हजारदेखि १५ हजार रुपैयाँसम्म जरिवाना असुल गरिएको नगरपालिकाले जनाएको छ।

नगरपालिकाले सरसफाइमा मात्र नभई नगरलाई सुन्दर बनाउन लगाइएका बोटबिरुवाका फूल टिप्ने र हाँगा भाँच्ने जस्ता कार्यमाथि पनि निगरानी बढाएको छ। नगरको सुन्दरता जोगाउनु सबैको साझा दायित्व भएको भन्दै नगर प्रमुख खानले यसमा सबै नगरवासीलाई जिम्मेवार बन्न आग्रह गर्नुभएको छ।