अर्घाखाँची । जिल्ला प्रहरी कार्यालय अर्घाखाँचीको आयोजनामा सन्धिखर्क नगरपालिका वडा नं. ७ मा शान्ति सुरक्षा र प्रहरी सेवा प्रवाहका विषयमा सर्वसाधारणको सुझाव तथा गुनासो सुन्ने उद्देश्यले नागरिक सुनुवाइ कार्यक्रम सम्पन्न भएको छ। ईलाका प्रहरी कार्यालय खनका प्रहरी निरीक्षक फल बहादुर तामाङको अध्यक्षता र वडा अध्यक्ष चुरा बहादुर के.सी.को प्रमुख आतिथ्यतामा वडा कार्यालय परिसरमा आयोजित उक्त कार्यक्रममा विभिन्न राजनीतिक दल, संघ–संस्था, आमा समूह तथा स्थानीय बासिन्दाको उल्लेख्य सहभागिता रहेको थियो।
कार्यक्रममा बोल्दै प्रमुख अतिथि वडा अध्यक्ष के.सी.ले समाजमा हुने अपराध नियन्त्रणका लागि प्रहरीको प्रयासमा नागरिकको भूमिका पनि उत्तिकै महत्त्वपूर्ण हुने बताए भने प्रहरी निरीक्षक तामाङले मंसिर महिनाका गतिविधिबारे जानकारी गराउँदै जनताको सुझाव अनुसार अघि बढ्ने प्रतिबद्धता व्यक्त गरे। प्रहरी सहायक निरीक्षक संगित परियारले सञ्चालन गरेको उक्त कार्यक्रमसँगै जिल्लाका छत्रदेव, शितगङ्गा, मालारानी र भूमिकास्थान लगायतका क्षेत्रमा पनि नागरिक सुनुवाइ सम्पन्न भइसकेको प्रहरीले जनाएको छ।
