भैरहवा । सुरक्षित आप्रवासन (सामी) परियोजना अन्तर्गत भैरहवामा वित्तीय साक्षरता र मनोसामाजिक परामर्श कक्षा सुरु भएको छ। "स्वदेशमै रोजगारी गरौं, वैदेशिक रोजगारीमा जाने नै भए सही सुचना लिएर सीप सिकेर मात्र जाऔं" भन्ने मूल नाराका साथ सिद्धार्थनगर नगरपालिका वडा नं. ७ मा उक्त कक्षा सञ्चालन गरिएको हो ।
कक्षाको उद्घाटन गर्दै सिद्धार्थनगर नगरपालिकाका प्रमुख एवं पूर्व संविधानसभा सदस्य इश्तियाक अहमद खानले वैदेशिक रोजगारीमा जाँदा सही सूचना लिनु नै ठगीबाट बच्ने सबैभन्दा सजिलो उपाय भएको बताउनुभयो । कार्यक्रममा बोल्दै नगर प्रमुख खानले स्वदेशमै उद्यम र रोजगारी गर्न चाहने युवाहरूका लागि नगर सरकारले विभिन्न स्वरोजगारमूलक तालिमहरू सञ्चालन गरिरहेको जानकारी दिनुभयो। उहाँले युवाहरूलाई नगरपालिकाद्धारा सञ्चालित त्यस्ता तालिममा सहभागी भई लाभ लिन समेत आग्रह गर्नुभयो।
