कपिलवस्तु । लुम्बिनी प्रदेशका मुख्यमन्त्री चेतनारायण आचार्यले कपिलवस्तुमा रहेको कपिल आरोग्य मन्दिर कपिलधामको अवलोकन गरेका छन् । महर्षी कपिलको पावन तपोभूमिको रुपमा रहेको बाणगंगा नगरपालिका–९ मा अवस्थित कपिल धामको आइतबार मुख्यमन्त्री आचार्यले अवलोकन गरेका हुन् । यो धामलाई प्रदेशको गौरवको आयोजनाको रुपमा अगाडि बढाउन सरकारले ध्यान दिने उनले प्रतिवद्धता व्यक्त गरे ।
कपिलधामले लुम्बिनी प्रदेशको धार्मिक, साँस्कृतिक, र पर्यटकीय महत्वलाई अझ उजागर गर्ने उनले विश्वास लिए । प्रदेश सरकारले पुरातात्विक र धार्मिक सम्पदाको संरक्षणका लागि विशेष योजना तयार गरी कार्यान्वयन गर्ने, प्रदेशका धरोहरहरूको दीर्घकालीन अस्तित्व सुनिश्चित गर्ने गरी सरकारले काम गर्ने उनले बताए । ‘लुम्बिनी प्रदेशलाई धार्मिक पर्यटनको केन्द्र बनाउने गरी सरकारले योजना अघि बढाएको छ’मुख्यमन्त्री आचार्यले भने–‘सरकारले यो धामको विकासको लागि ४० लाख बजेट बिनियोजन गरेको छ । यस्ता पुरातात्विक सम्पदाको संरक्षण, सम्बर्द्धन, प्रबर्द्धन गर्न ध्यान दिएका छौं ।’
महर्षि कपिलको पावन तपोभूमि, धार्मिक पौराणिक एवम् ऐतिहासिक स्थल कपिलधाम स्थापना भएको थियो । यस क्षेत्रमा योग, ध्यान, सत्संग, जडिबुटी, गौशाला, गुरुकुलम्, प्राकृतिक चिकित्सालय, पुस्तकालय, साहित्य बाल उद्यान सञ्चालनको योजना छ ।
वैदिक संस्कृत विद्यापीठ गुरुकुलमको लागि शैक्षिक अनुदान, कक्षा कोठा भवन र छात्रावास भवन निर्माण गर्न सरकारले सहयोग गर्नुपर्ने माग राखिएको छ । धामका अध्यक्ष शंकर प्रसाद आचार्यले मुख्यमन्त्री आचार्यलाई मागपत्र समेत बुझाएका छन् ।
